Azərbaycan Prezidenti və xanımı Bakıda Moskva Dövlət Beynəlxalq Münasibətlər İnstitutu məzunlarının I Dünya Forumunda iştirak edirlər (FOTO)

Azərbaycan, Bakı, 12 aprel /Trend/

Aprelin 12-də Bakıda Moskva Dövlət Beynəlxalq Münasibətlər İnstitutu (MDBMİ) məzunlarının I Dünya Forumu keçirilir. Forumda Azərbaycan Prezidenti İlham Əliyev və xanımı Mehriban Əliyeva iştirak edirlər.

MDBMİ Məzunlarının Azərbaycan Assosiasiyasının bu Forumun Bakıda keçirilməsi təşəbbüsü dünyanın hər yerində bu institutun məzunları arasında böyük maraq doğurmuşdur.

Forumda Rusiya, Ukrayna, Macarıstan, Çexiya, Bolqarıstan, Moldova, Polşa, Slovakiya, Kuba, Koreya Respublikası, İsrail, Qazaxıstan, Qırğızıstan, Vyetnam və s. ölkələrdən rəsmilər, nüfuzlu beynəlxalq təşkilatların, maliyyə və biznes nümayəndələri iştirak edirlər. Ümumiyyətlə, forumda 400 nəfərdən çox nümayəndə, həmçinin Azərbaycanda, eləcə də xaricdə yaşayıb çalışan azərbaycanlı məzunlar iştirak edirlər.

"Birlikdə gələcəyə doğru" devizi altında keçirilən Forumun açılış mərasimində Azərbaycan Respublikasının Prezidenti İlham Əliyev çıxış etmişdir.

Çıxış edən MDBMİ-nin rektoru, Rusiyanın Elmlər Akademiyasının akademiki Anatoli Torkunov Rusiya Federasiyasının Prezidenti Vladimir Putinin Forumun iştirakçılarına təbrik məktubunu oxumuşdur.

Sonra çıxış edən Rossotrudniçestvonun rəhbəri, MDB işləri üzrə Rusiya Federasiyası Prezidentinin xüsusi nümayəndəsi, MDBM-nin Qəyyumluq Şurasının üzvü Konstantin Koçayev Rusiyanın xarici işlər naziri Sergey Lavrovun Forumun iştirakçılarına təbrik məktubunu diqqətə çatdırmışdır.

Daha sonra MDBM-nin himni ifa olunmuşdur. Sonra Forumun işi sessiyalarla davam etmişdir.

Forumda prioritet istiqamətlərin əsası kimi təhsil, qlobal iqtisadiyyatda sabit inkişaf yolunda enerji və ekoloji meyarlar məsələləri, habelə beynəlxalq problemlərin həllində vətəndaş təsisatlarının, ən əvvəl media birliyinin və biznesin rolu ilə əlaqədar məsələlər müzakirə olunur.