Azərbaycan, Bakı, 19 iyun /Trend, müxbir İ.İsabalayeva/
Azərbaycanda bu ilin sentyabr-noyabr aylarında məktəbli uşaqlar arasında helmintlərə (bağırsaq qurdu) qarşı profilaktik tədbirlərin gücləndirilməsi məqsədilə yeni proqramın tətbiqinə başlamaq nəzərdə tutulur.
Rostropoviç-Vişnevskaya Fondunun Azərbaycandakı nümayəndəliyinin rəhbəri Soltan Məmmədov çərşənbə axşamı Trend-ə deyib ki, proqramı Ümumdünya Səhiyyə Təşkilatı, YUNİSEF və Səhiyyə Nazirliyi ilə birgə reallaşdıracaqlar. Dehelmintizasiya proqramı 400 000 nəfər 1-4-cü sinif şagirdini əhatə edəcək.
Proqram çərçivəsində laborator tədqiqatların aparılması, dərman preparatlarının təmini, uşaqlar və valideynlər arasında maarifləndirmə işlərinin aparılması, sosial mobilizasiya tədbirlərinin və həkimlər arasında təlim məşğələlərinin keçirilməsi planlaşdırılır.
Məmmədov deyib ki, proqram Səhiyyə Nazirliyi tərəfindən uşaqlar arasında parazitar xəstəliklərə qarşı aparılan proqramlara dəstək məqsədilə həyata keçiriləcək.