Bakı.Trend:
Azərbaycan UN-Habitat ilə əməkdaşlığın gücləndirilməsinə sadiq qalır.
Trend xəbər verir ki, bunu Ümumdünya Şəhərsalma Forumunun 13-cü sessiyasının (WUF13) milli koordinatorunun müavini, Dövlət Şəhərsalma və Arxitektura Komitəsi Aparatının rəhbər müavini Gülşən Rzayeva WUF13 çərçivəsində assambleyaların birgə bağlanış mərasimində çıxışı zamanı deyib.
“İnanırıq ki, WUF13 çərçivəsində aparılan müzakirələr və onların nəticələri mütləq nəzərə alınacaq və iyul ayında Nyu-Yorkda keçiriləcək yüksək səviyyəli görüşdə təqdim olunacaq Yeni Şəhər Gündəliyinin icrasının gedişinə dair icmala töhfə verəcək.
Azərbaycan UN-Habitat və bu gün burada təmsil olunan bütün tərəfdaşlarla əməkdaşlığın gücləndirilməsinə sadiq qalır. Həmçinin ümid edirik ki, bu assambleyalar sayəsində formalaşan tərəfdaşlıqlar, şəbəkələr və ideyalar Ümumdünya Şəhərsalma Forumu başa çatdıqdan sonra da uzun müddət inkişaf etməyə davam edəcək”, - deyə o bildirib.
G.Rzayeva qeyd edib ki, Bakıda keçirilən müzakirələr Bakı Fəaliyyətə Çağırış sənədinə mühüm töhfə verəcək və əlçatan mənzil təminatı, eləcə də dayanıqlı şəhər inkişafı məsələləri ətrafında qlobal təkanın gücləndirilməsinə kömək edəcək.
