Azərbaycan, Bakı, 09 sentyabr / Trend , müxbir N.İsmayılova /
Qeyri-bank kredit təşkilatı TBC Kredit mənzillərin alınması və təmirinə verilən kreditlərin müddətini üç ilə qədər artırıb. Bu barədə kredit təşkilatından bildirilib. Əvvəlcə bu məqsəd üçün ayrılan vəsaitlər bütün istehlak kreditləri kimi 18 ay müddətinə verilirdi.
"Bu ilin sentyabrın əvvəlindən etibarən istehlak krediti çərçivəsində təqdim edilən ipoteka kreditlərinin verilməsi müddəti üç ilədək artırılıb", - TBC Kreditdən bildirilib.
Təşkilatdan bildirildiyi kimi, ilin əvvəlindən sentyabrın əvvəlinədək təşkilat tərəfindən, ipoteka krediti də daxil olmaqla, 1,5 milyon dollar həcmində 219 istehlak krediti verilib.
İstehlak kreditləri portfelinin həcmi ümumi kredit portfelinin təxminən 55 faizini təşkil edir. Onun 40 faizini ipoteka kreditləri, 15 faizini isə digər istehlak kreditləri təşkil edir. TBC Kreditin ipoteka portfelinin həcmi təxminən yeddi milyon manat təşkil edir.
Hesabat dövrü ərzində təşkilat tərəfindən 2,2 milyon dollar həcmində 88 biznes-kredit verilib. Biznes-kreditlər üzrə portfelin həcmi ümumi kredit portfelinin 45 faizini təşkil edir.
2003-cü ildən TBC Kredit Azərbaycanda ilk dəfə olaraq ipoteka kreditlərinin verilməsinə başlayıb.
TBC Kreditin əsas təsisçisi Gürcüstanın TBC Bank-ıdır. Bank şirkətin səhmlərinin 75 faizinə sahibdir. Səhmlərin 25 faizi ShoreBank qrupuna daxil olan beynəlxalq konsaltinq şirkəti ShoreBank International Ltd şirkətinə məxsusdur. Ötən ilin dekabr ayında TBC Bank-ın TBC Kreditin kapitalına daxil olması əlavə investisiyalar hesabına həyata keçirilib. Bunun da nəticəsində kredit təşkilatının kapitalı 10 milyon dollara kimi artıb.
Məqalə müəllifi ilə əlaqə ünvanı: [email protected]
