Azərbaycan, Bakı, 26 yanvar /Trend/
Son beş il ərzində Azərbaycanda avtomobillərin sayı üzrə göstərici hər min nəfərə 1,5 dəfə artaraq 110 ədəd təşkil edib. Trend-in məlumatına görə, bu barədə çərşənbə günü Dövlət Statistika Komitəsindən bildirilib.
Komitədən bildiriblər ki, 2010-cu ilin yekunları üzrə respublikada avtomobillərin sayı 2009-cu illə müqayisədə 56,7 min artaraq 982,6 min ədəd təşkil edib.
Respublikada avtomobillərin ümumi sayından 79,4 faiz minik, 12,1 faiz yük avtomobillərinin, üç faiz avtobusların payına düşür, yerdə qalan hissə xüsusi təyinatlı avtomobil vasitələridir.
2010-cu ilin yekunları üzrə avtomobil nəqliyyatı vasitəsilə 99,9 milyon ton yük daşınıb ki, bu da 2009-cu ildə olduğundan 6 faiz çoxdur. Sərnişin daşımalarının həcmi 1,2 milyard nəfər (7,7 faiz artıb) olub. Sərnişinlərin 96,5 faizi avtobuslarla və 3,5 faizi minik avtomobilləri ilə daşınıb.
