Аzərbaycan, Bakı, 28 fevral /Trend, müxbir N.İsmayılova/
2010-cu ilin dekabr ayında Azərbaycan banklarının resurs bazasının formalaşmasında əsas mənbə rolunu hüquqi və fiziki şəxslərin depozit bazası saxlayıb. Bu barədə bazar ertəsi Azərbaycan Mərkəzi Bankının (AMB) maliyyə sabitliyinə dair dərc etdirdiyi hesabatında deyilir.
İlin əvvəli ilə müqayisədə bankların ümumi depozit bazası 794,6 milyon manat artaraq 5,4 5 milyon manat təşkil edib. Öhdəliklərin ümumi strukturunda depozitlərin payı 46,6 faiz, resurs bazasının ümumi strukturunda isə 38,6 faiz təşkil edib.
2010-cu ildə hüquqi şəxslərin depozitlərinin dinamikasında dəyişkənlik müşahidə olunub. Onların həcmi 799,7 milyon manat artaraq 2,4 milyard manat olub. Cəlb olunan resurslarda əhalinin depozitlərində artım müşahidə olıunub. Beləliklə, banklar maliyyə çevikliyinin artırılması və likvidlik risklərinin azaldılması məqsədilə daxili resurslara daha çox üstünlük verir.
Yanvarın 1-nə olan məlumata görə, bank öhdəliklərində əhalinin əmanətlərinin payı 2010-cu ilin əvvəlindəki 24,2 faizə nisbətdə 27,2 faiz olub. Əhalinin əmanətlərinin orta aylıq artımı 2,2 faiz təşkil edib. Lakin ilin ikinci yarısında əhəmiyyətli artım müşahidə olunub.
Yerləşdirmə müddətinə görə depozit portfelinin strukturunda yaxşılaşma ölkənin bank sisteminə etimadın artdığını göstərir. Əhalinin uzunmüddətli əmanətlərinin artım dinamikası illik hesablamada 35,3 faiz, tələbli vəsaitlər isə 10,4 faiz təşkil edir.
Əmanətlərin ümumi həcmində 34,6 faiz birillik ödəniş müddəti üzrə (ilin əvvəlindəki 32,3 faizə qarşı) əmanətlər təşkil edir. 2010-cu il ərzində banklararası öhdəliklər 24,5 faiz, yaxud 417,4 milyon manat artaraq yanvarın 1-nə 2,1 milyard manat olub.
2010-cu ildə qeyri-rezidentdən cəlb edilən öhdəliklərin xalis artımı 111,4 milyon manat, yaxud 6,4 faiz artıb. Bank sisteminin xarici borclarının həcmi 1,85 milyard manata çatıb ki, bu da ümumi öhdəliklərin 16,6 faizini təşkil edib.
Fevralın 28-nə olan rəsmi məzənnə 0,7941 AZN/USD təşkil edir.
