Azərbaycan, Bakı, 22 aprel /Trend, müxbir A.Axundov/
Azərbaycan Auditorlar Palatası auditorlara xidmətlərinin tövsiyə edilən qiymət sistemini təklif edib. Bu barədə cümə günü Azərbaycan Auditorlar Palatasının sədri Vahid Novruzov Yeni Azərbaycan Partiyasının mənzil-qərargahında keçirilən mətbuat konfransında deyib.
"Qanunvericiliyin tələblərinə əsasən, bazar iqtisadiyyatı şəraitində qiymətlər Auditorlar Palatası tərəfindən müəyyənləşdirilə bilməz, lakin auditor xidmətlərinin keyfiyyətinin yaxşılaşdırılması və haqsız rəqabət hallarından yayınmaq məqsədilə auditorlara onların xidmətlərinin tövsiyə edilən qiymət sistemini təklif etmişik", - Novruzov bildirib.
Onun sözlərinə görə, auditor xidmətlərinin orta qiyməti 1500 manatdır.
"Bu sahədə vəziyyətin yaxşılaşdırılması məqsədilə Palata auditorlara fəaliyyət növündən və auditin aparıldığı təsərrüfat subyektinin dövriyyəsindən asılı olaraq auditor xidmətlərinin qiymətlərini tövsiyə edib", - Novruzov bildirib.
"Auditor öz işində bu tövsiyələri rəhbər tutmasa, Palata nəzarətedici orqan kimi, həmin auditorların üzərində nəzarəti gücləndirəcək", - o, vurğulayıb.
Aprelin 22-nə olan rəsmi məzənnə 0,7917 AZN/USD təşkil edir.
