Azərbaycan, Bakı, 23 sentyabr /Trend, müxbir H.Vəliyev/
2007-ci il dekabrın 25-də Azərbaycan Parlamenti tərəfindən ikinci oxunuşda qəbul olunmuş "Rəqabət haqqında" Məcəllənin layihəsi payız sessiyasında müzakirəyə çıxarılacaq. Trend-in məlumatına görə, bu barədə cümə günü jurnalistlərə Milli Məclisin İqtisadi siyasət komitəsinin sədri Ziyad Səmədzadə bildirib.
"Hazırda bu layihə üzərində ciddi iş gedir. Dünya maliyyə-iqtisadi böhranı səbəbindən məcəllə layihəsinə yeni meyarlar əlavə edilib. Biz onları müzakirə etmək fikrindəyik, çünki bu çox mürəkkəb məsələdir və milli maraqlara xidmət etməlidir", - Səmədzadə deyib.
O xatırladıb ki, hazırda Azərbaycanda bu sahədə "Antiinhisar fəaliyyəti haqqında", "Rəqabət haqqında" bir sıra qanunlar qüvvədədir və onlar çoxdan qəbul edilib.
"Son 15 il ərzində əsaslı dəyişikliklər və proseslər baş verib ki, onlar dünya təcrübəsi nəzərə alınmaqla "Rəqabət haqqında" Məcəllədə öz əksini tapacaq", - parlament komitəsinin sədri bildirib.
Onun sözlərinə görə, həmin sənəd bu gün bir çox sahələrdə - bank sektorunda, reklam fəaliyyətində, qiymətli kağızlar bazarında və bir sıra başqa sahələrdə mövcud olan inhisarçılığın qarşısının alınmasına yönəlib.
"Ümumilikdə məcəllə azad bazar münasibətlərinin inkişafına istiqamətlənib", - Səmədzadə deyib.
Məcəllə həm istehlakçıların, həm də istehsalçıların maraqlarına toxunur. Məcəllə layihəsi bazarın şərtlərinin dəyişməsi, antiinhisar fəaliyyəti təcrübəsinin toplanması və perspektivli inkişaf planları ilə əlaqədar yenilənib. Məsələn, layihənin ikinci oxunuşu zamanı kartel sazişləri və onlara qarşı fəaliyyət haqqında qaydalar əlavə olunub.
Məcəllə layihəsi birinci oxunuşda 2006-cı ilin payızında qəbul edilib. Sənədin qəbulu ilə bağlı ləngimələr İqtisadi İnkişaf Nazirliyinin strukturundakı dəyişikliklərlə, iki departamentin birləşdirilməsi və onların bazasında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin yaradılması ilə əlaqədardır. Yeni dövlət xidməti 2010-cu ildə fəaliyyətə başlayıb.
Məcəllə sahibkarlıq fəaliyyətində azad və sağlam rəqabətin təmin olunmasının hüquqi əsaslarını və müdafiəsini müdafiə edir, eləcə də mal və maliyyə bazarlarında fəaliyyət göstərən təsərrüfat subyektlərinə münasibəti tənzimləyir.
Layihəyə görə, bazarda 35 faizlik və daha çox paya malik olan təsərrüfat subyekti inhisarçı sayılır. Lakin bank, sığorta, lizinq xidmətləri, qeyri-dövlət pensiya sığortası bazarında 25 faizdən artıq paya sahib olan təsərrüfat subyekti, qiymətli kağızlar bazarında isə 10 faizdən artıq paya malik olan təsərrüfat subyekti inhisarçı hesab edilir. İnhisarçı mövqeyə sahib subyektlər qıtlıq yaranan zaman əsassız olaraq öz məhsullarının (xidmətlərinin) qiymətlərini artırmaq hüququna, eləcə də rəqabət mühitinin yaradılması imkanlarına malik deyillər.
Təbii inhisar sahələrinə aid edilir: neft və neft məhsullarının magistral boru kəmərləri ilə nəqli; nəqliyyat xidmətləri, təbi qazın paylanması və təmin olunması; elektrik enerjisinin və istilik enerjisinin istehsalı, ötürülməsi və təmin olunması xidmətləri; dəmiryolun magistral və yerli xətlərində xidmətlər, yol qurğuları və tikililərinin istismarı, dəmiryol stansiyaları vağzalları, hərəkətin idarə olunması və təhlükəsizliyi üzrə fəaliyyət, magistral avtomobil yolları və ümumi əhəmiyyətli yolların istismarı, eləcə də digər xidmət növləri.
