Azərbaycan, Bakı, 14 dekabr / Trend, müxbir A.Axundov /
Azərbaycan Mərkəzi Bankının (AMB) açıqladığı tədiyyə balansına görə, 2012-ci ilin yanvar-sentyabrı üzrə cari əməliyyatlar hesabının profisiti 20,1 faiz artaraq 11,5 milyard dollar təşkil edib. Bu barədə çərşənbə günü Azərbaycan Mərkəzi Bankından (AMB) bildirilib.
Eləcə də neft-qaz sektorunda cari əməliyyatlar hesabı 17,9 milyard dollar təşkil edib.
"Neft-qaz sektorunun profisiti qeyri-neft sektoru üzrə cari hesabın 6,3 milyard dollarlıq kəsirini tam örtüb", - balansda deyilir.
Tədiyyə balansının ümumi profisiti 57,17 faiz azalaraq 4,48 milyard dollar təşkil edib.
Sektorlar üzrə tədiyyə balansının təhlili göstərib ki, əvvəlki illərdə olduğu kimi, 2012-ci ilin yanvar-sentyabrında da neft-qaz sektorundakı xarici iqtisadi əməliyyatlar müsbət, qeyri-neft sektorundakı əməliyyatlar isə mənfi saldoya malik olub.
Üç rüb ərzində xarici ticarət dövriyyəsinin ümumi həcmi 32,1 milyard dollar təşkil edib və xarici ticarət balansı 17,5 milyard dollar məbləğində müsbət saldo ilə nəticələnib. Bununla yanaşı, idxal əməliyyatları 7,3 milyard dollar, ixrac əməliyyatları isə 24,8 milyard dollar məbləğində həyata keçirilib.
Hesabat dövrü ərzində 151 ölkə ilə ticarət əlaqələri olub. Bununla yanaşı, xarici ticarətin 9,1 faizi MDB, 90,9 faizi isə digər xarici ölkələrin payına düşür. Daha intensiv ticarət əlaqələri İtaliya, ABŞ, Rusiya, Fransa, Türkiyə, Almaniya, Böyük Britaniya, Hİndistan və İndoneziya ilə aparılıb. Azərbaycanın ümumi ticarətində bu ölkələrin payı 66,7 faiz təşkil edib.
