Azərbaycan, Bakı, 17 avqust /Trend, müxbir E. Əliyev/
Dövlət Gömrük Komitəsi (DGK) cari ilin yanvar-iyul aylarında xarici ticarət əməliyyatlarının ötən ilin analoji dövrü ilə müqayisədə 3,42 faizinin artdığını bildirib. Trend-in məlumatına görə, bu barədə şənbə günü komitənin qəzetində dərc olunan hesabatında bildirilir.
Bu dövr ərzində Azərbaycan 141 ölkə ilə ticarət əməliyyatı aparıb.
Hesabata görə, Azərbaycanın ümumi ticarət dövriyyəsinin həcmi 20,05 milyard dollar təşkil edib.
Xarici ticarət əməliyyatlarında profisit 7,7 milyard dollar təşkil edib.
Hesabatda bildirilir ki, bu dövr ərzində ölkənin xarici ticarət əməliyyatlarında 5237 hüquqi və fiziki şəxs iştirak edib ki, onlardan 3219 hüquqi, 2018-i isə fiziki şəxslərdir.
Yanvar-iyul aylarında 13,86 milyard dollar həcmində ixrac əməliyyatları həyata keçirilib ki, bu da ötən ilin analoji göstəricilərindən 1,55 faiz azdır.
İxrac əməliyyatlarında dövlət sektorunun payı 13,05 milyard dollar (94,15 faiz), özəl sektorun 713,03 milyon dollar (5,14 faiz), fiziki şəxslərin isə 104,43 milyon dollar (0,7 faiz) olub.
Yanvar-iyul ayının yekunlarına görə, idxal 6,18 milyard dollar təşkil edib ki, bu da 2012-ci ilin analoji dövründə qeydə alınan göstəricidən 16,63 faiz çoxdur.
İdxal əməliyyatlarında dövlət sektorunun payı 1,88 milyard dollar (30,42 faiz), özəl sektorun 3,98 milyard dollar (64,4 faiz), fiziki şəxslərin isə 318,98 milyon dollar (5,16 faiz) olub.
Cari ilin yanvar-iyul aylarında Azərbaycandan 1677 adda məhsul ixrac, 5587 adda məhsul isə idxal olunub.
