Azərbaycan, Bakı, 10 fevral /Trend, müxbir E.Əliyev/
İslam bankçılığı sahəsində qanunvericiliyin yaradılmasına dair təklif 2014-cü ilin oktyabrınadək Milli Məclisə təqdim ediləcək. Trend-in məlumatına görə, bu barədə "Azernews" qəzetinə müsahibəsində Azərbaycan Beynəlxalq Bankının (ABB) İslam Bankçılığı Departamentinin rəhbəri Bəhram Qurbanzadə bildirib.
O deyib: "AMB, ABB, İqtisadiyyat və Sənaye, Maliyyə nazirlikləri və Nazirlər Kabinetinni nümayəndələrindən ibarət işçi qrupu yaradılıb. Qrupun məqsədi Azərbaycanda islam maliyyə institutlarının fəaliyyətinin tənzimlənməsi və qüvvədə olan qanunvericilikdə dəyişiklik edilməsinə hazırlıqdır".
Bank işi sahəsində qanunvericiliyin mövcud normaları ikiqat vergitutma məsələlərinin həll olunmaması, eləcə də müsəlman hüququna, şəriət normalarına söykənən bu məhsullara qoyulmuş məhdudiyyətlər (faiz dərəcələri və onların təyini ilə bağlı, bu və ya digər sahələrdə əməliyyatların aparılmasına qadağalar və başqaları) səbəbindən islam bank məhsullarının tətbiq edilməsi imkanlarını əhəmiyyətli dərəcədə məhdudlaşdırır
Onun sözlərinə görə, İslam İnkişaf Bankı (İİB) bu sahədə dəstək göstərilməsi üçün artıq Azərbaycan hökumətindən rəsmi sorğu alıb: "Hazırda sorğu müzakirədədir. İİB-nin missiyası müvafiq qrantın verilməsi haqqında qərarın hazırlanması üçün cari ilin fevralında Azərbaycana baş çəkəcək. Bunlar bankın nümayəndələri və xarici mütəxəssislər də ola bilərlər. Qrantın məbləği və başqa şərtlər hələ müəyyən edilməyib".
ABB islam bankçılığı xidmətlərinin təqdim edilməsinə 2003-cü ildən başlayıb və bu sahədə ölkənin bank bazarında ilkə imza atıb. Bank bu sahədə xidmətləri İİB qrupundan cəlb edilmiş resursların hesabına göstərir.
