Azərbaycan, Bakı, 29 aprel /Trend, müxbir E.Əliyev/
Bu il iyulun 1-dən Azərbaycanda sığorta şirkətlərinin veb-saytlarına minimum tələblər qüvvəyə minəcək.
Trend-in məlumatına görə, Maliyyə Nazirliyinin müvafiq qərarı dünən Azərbaycanın Dövlət Hüquqi Aktlar Reyestrində dərc edilib.
Tələblərə əsasən, "Ana səhifə"də sığortaçının əlaqə məlumatları əks etdirilməli, sığortaçının baş ofisinin, filial və nümayəndəliklərinin ünvanı, telefon nömrəsi və elektron poçt ünvanı olmalıdır. Sığortaçının rəhbər işçiləri barədə məlumatlar (soyadı, adı və atasının adı, həmçinin tutduğu vəzifə) yerləşdirilməlidir. "PDF" formatında yüklənmə və mətn üzrə axtarış imkanlarına malik olan, sığortaçının bütün sığorta qaydaları aydın görünən siyahı üzrə yerləşdirilməlidir.
Saytda sığorta hadisəsi hesab edilə bilən hal və ya hadisə barədə məlumat və həmin məlumatın qəbul edilməsini təsdiq edən avtomatik cavab məktubu göndərmək imkanı verən, hər bir sığorta növü üzrə sığorta hadisəsi barədə spesifik suallardan ibarət sorğu bölməsi mövcud olmalıdır. Sığortaçıdan və ya onun hər hansı əməkdaşından şikayət verilməsi prosedurunu əks etdirən məlumatlar, həmçinin şikayətlərə görə məsul olan vəzifəli şəxsin telefon nömrəsi və elektron poçt ünvanı yerləşdirilməli, şikayətin elektron qaydada verilməsi və həmin şikayətin qəbul edilməsini təsdiq edən avtomatik cavab məktubu göndərmək imkanına malik olan müstəqil bölmə mövcud olmalıdır. "PDF" formatında yüklənmə imkanına malik olan, sığortaçının maliyyə hesabatları yerləşdirilməlidir.
Bundan başqa, Maliyyə Nazirliyinin qərarı ilə sığorta şirkətlərinin elektron informasiya sistemlərinə minimum tələblər, həmçinin bu sistemlərdəki informasiyanı təsbit edən meyarlar müəyyən edilib. Onlara tələblər 2015-ci il yanvarın 1-dən qüvvəyə minəcək.
Azərbaycanda 28 sığorta və 1 təkrar sığorta şirkəti fəaliyyət göstərir.