Azərbaycan, Bakı, 5 iyun /Trend, müxbir Z.Qurbanova/
2014-cü ilin yanvar-aprel aylarında Azərbaycan dövlət büdcəsinin mədaxil hissəsinə faktiki daxilolmalar ötən ilin müvafiq dövrü ilə müqayisədə 2,7 faiz azalaraq 6471,3 milyon manat (ÜDM-in 35,5 faizi) təşkil edib. Bunu cümə axşamı Trend-ə hökumətdən deyiblər.
Dövlət büdcəsinin xərcləri isə 2,8 faiz azalaraq 6068,7 milyon manat (ÜDM-in 33,3 faizi) olub.
Hesabat dövründə büdcənin profisiti 402,6 milyon manat və ya ÜDM-in 2,2 faizini təşkil edib. Ötən ilin eyni dövründə büdcənin profisiti 410,4 milyon manat təşkil edib.
Daxilolmalar strukturunda 41 faiz (2650,4 milyon manat) Vergilər Nazirliyinin hesabına təmin edilib.
Gömrük rüsumları və vergilərindən daxilolmalar 463,9 milyon manat (7,2 faiz xüsusi çəki ilə), digər mənbələr hesabına isə 3357 milyon manat (51,8 faiz) təşkil edib.
Qeyd edilən dövrdə vergi yığımları ötən ilin analoji dövrünə nisbətən 5,4 faiz, gömrük ödənişləri 14,3 faiz artıb, digər mənbələrdən daxilolmalar isə 10,1 faiz azalıb.
Yanvar-aprel aylarında əlavə dəyər vergisindən (ƏDV) dövlət büdcəsinə 995,5 milyon manat və ya ümumi gəlirlərin 15,4 faizi daxil olub. Mənfəət vergisi üzrə daxilolmalar 1054,9 milyon manat (16,3 faiz), gəlir vergisi üzrə 306,4 milyon manat (4,7 faiz), aksiz vergisi üzrə 264,8 milyon manat (4,1 faiz), əmlak vergisi üzrə 48 milyon manat (0,7 faiz), torpaq vergisi üzrə 13,1 milyon manat (0,2 faiz), yeraltı sərvətlər vergisi üzrə 45,8 milyon manat (0,7 faiz), xarici iqtisadi fəaliyyət vergisi üzrə isə 216,4 milyon manat (3,4 faiz) təşkil edib.
Hesabat dövründə büdcə vəsaitlərindən əhalinin sosial təminatı və müdafiəsinə 680,4 milyon manat (11,2 faiz xüsusi çəki ilə), təhsilə 386,6 milyon manat (6,4 faiz), səhiyyəyə 157,6 milyon manat (2,6 faiz), prokurorluq, təhlükəsizlik, hüquq-mühafizə və məhkəmə orqanlarının saxlanılmasına 292,9 milyon manat (4,8 faiz), iqtiqsadiyyata investisiya qoyuluşlarına isə 3016,6 milyon manat (49,7 faiz) xərclənib.
Dövlət büdcəsi xərclərinin 20,2 faizi (1227,3 milyon manat) əhalinin əməkhaqqı, pensiya və müavinətlərinin ödənişinə xərclənib.
2014-cü il dövlət büdcəsinin gəlirləri 18,384 milyard manat, xərcləri isə 20,063 milyard manat səviyyəsində nəzərdə tutulur.
