Azərbaycan, Bakı, 31 may /Trend, müxbir Azad Həsənli/
Azərbaycanda qızıl istehsalçısı "Anglo-Asian Mining PLC" (AAM) şirkəti 2015-ci ilin ikinci yarısında yeni "Qadir" mədənində qızıl hasilatına başlayacaq. Bu barədə Trend şirkətə istinadən məlumat verir.
"Qadir" yeraltı mədəni "Gədəbəy" mədən kompleksindən təqribən 1 kilometr aralıda yerləşir.
AAM ötən il daha bir mədəndə - "Qoşa"da qızıl hasilatına başlayıb. 2014-cü ildə bu mədəndə 28 891 min ton filiz hasil edilib, hər tondan 4,15 qram qızıl çıxarılıb.
"Qoşa"nın ehtiyatları təqribən 40 min unsiya qızıl qiymətləndirilir. Bu həcmin 2017-ci ilədək hasil edilməsi planlaşdırılır.
Şirkət bu ilin I rübündə 17 193 unsiya qızıl hasil edib ki, bu da ötən ilin analoji göstəricisindən 52 faiz çoxdur.
AAM bu ilin sonunadək 70-75 min unsiya qızıl hasil etməyi planlaşdırır; onun bir hissəsi "Qoşa" və "Qadir" mədənlərində hasil ediləcək.
Qeyd edək ki, Azərbaycanda bi ilin I rübündə SART metodu ilə 182 ton mis və 1950 unsiya gümüş hasil edilib.