Azərbaycan Dövlət Gömrük Komitəsinin nümaynədə heyəti DGK sədrinin müavini Əsgər Abdullayevin rəhbərliyi ilə noyabrın 6-dan 8-dək Litvada işgüzar səfərdə olub. Trend in Komitəyə istinadən xəbər verdiyi kimi, səfərdə məqsəd qaçaqmalçılıq və gömrük qaydalarının pozulması halları ilə mübarizə çərçivəsində fikir mübadiləsi aparmaqdan ibarət olub.
Nümayəndə heyəti Litva Gömrük Departamenti başçısının müavini Yonas Mişkinislə görüşüb. Görüşdə gömrük orqanları arasında əməkdaşlığın və informasiya mübadiləsinin genişləndirilməsi məsələləri, qaçaqmalçılıqla mübarizə üzrə birgə fəaliyyət, gömrük qaydalarının pozulması hallarının qarşısının alınması ilə bağlı məsələlər müzakirə olunub. Hər iki ölkənin iqtisadi əməkdaşlığının inkişafında gömrük orqanlarının rolu məsələsinə toxunulub.
Səfər zaman Azərbaycan gömrük işçilərinə risklərin qiymətləndirilməsinin Avropa metodları, rentgen sistemi və mobil qruplarının tətbiqi barədə məlumat verilib. Nümayəndə heyəti Litva Gömrük İdarəsinin Kinologiya Mərkəzi ilə tanış olub.