Azərbaycan, Bakı / Trend müxbir İ.Xəlilova / Azərbaycanın Ümumdünya Ticarət Təşkilatına (ÜTT) daxil olmasına hazırlıq üzrə dövlət komissiyası daxil olma prosesinin ölkə üçün əlverişli şəraitdə sürətləndirilməsi məqsədilə tədbirlərin görülməsi zərurətini nəzərdən keçirib. Bu barədə xarici işlər nazirinin müavini, danışıqlar qrupunun başçısı Mahmud Məmmədquliyev məlumat verib.
Onun sözlərinə görə, məsələ ÜTT üzv-ölkələri ilə ikitərəfli və çoxtərəfli əsasda danışıqların, eləcə də işçi qrupunun iclasının keçirilməsi prosesinin sürətləndirilməsindən ibarətdir.
ÜTT-yə daxil olmaq üzrə danışıqların növbəti V mərhələsinin keçirilməsi üzv-ölkələrin suallarının cavablarını Ümumdünya təşkilatının katibliyinə nə qədər tez təqdim olunmasından asılı olacaq.
Nazir müavini hesab edir ki, işçi qrupunun iclasını həmçinin çoxtərəfli danışıqlar hesab etmək olar, belə ki, bu görüşdə 35-40 ölkənin nümayəndələri və ÜTT-nin digər üzv-dövlətləri iştirak edir.
M.Məmmədquliyevin sözlərinə görə, ÜTT-nin üzv-ölkələri Azərbaycan tərəfinə təqdim olunmuş suallar üzrə əlavə informasiya istəyib. Prosesin sürətləndirilməsi həmçinin Azərbaycan qanunvericiliyinin ÜTT normalarına, beynəlxalq standartlara və Ümumdünya təşkilatı çərçivəsin də imzalanmış sazişlərə uyğunlaşdırılması proqramının reallaşdırılmasından asılı olacaq.
Tədbirlər planına əsasən qanunvericilikdə dəyişikliklər bir-iki il ərzində həyata keçirilməli və əsas 2007-ci ilə diqqət yetirilməlidir.
Bundan başqa, yaxın vaxtda Azərbaycanın ÜTT-dəki üzvlüyünün müsbət və mənfi tərəflərinin təqdimatının keçirilməsi planlaşdırılır.