Azərbaycan, Bakı/ Trend müxbir İ.Xəlilova/ Azərbaycan-Rusiya iqtisadi məsələlər üzrə hökumətlərarası komissiyanın XI iclasının keçirilmə tarixinin dəyişdirilməsi Bakıda innovasiya fəaliyyəti sahəsində birgə tədris mərkəzinin yaradılmasının vaxtını uzadıb. Bu barədə çərşənbə axşamı Rusiyanın Azərbaycandakı ticarət nümayəndəsi Yuriy Şedrin bildirib. Onun sözlərinə görə, bu qərar hökumətlərarası komissiyanın protokolunda yer almalı idi. İclasın keçirilməsi 24 aprel tarixinə nəzərdə tutulsa da, texniki səbəblər ucbatından sentyabr-oktyabr aylarına qədər təxirə salınıb.
Şedrin əmindir ki, iki ölkə arasında mərkəzin yaradılması ilə bağlı razılıq 2007-ci ilin sonuna qədər həyata keçiriləcək. Yeni mərkəz Bakıda mövcud olan innovasiya mərkəzinin bazasında Rusiyanın aparıcı təhsil qurumları, həmçinin ali iqtisadiyyat məktəbinin yardımı ilə qurulacaq.
Ticarət nümayəndəsi hesab edir ki, mərkəzdə təhsil sistemi ali, həmçinin virtual təhsil texnologiyasına əsaslanacaq.
