Azərbaycan, Bakı, 28 avqust / Trend /
2009-cu ilin birinci yarısında Gürcüstanın ARDNŞ-yə məxsus Qara dəniz neft terminalı 2008-ci ilin birinci yarısındakı 100 min tona qarşı bir milyon ton yük göndərib. Bu barədə Gürcüstan hökumətinin məlumatında deyilir.
"Bu ilin altı ayı ərzində terminaldan 2008-ci ilin birinci yarısındakı 6 gəmiyə qarşı 57 gəmi göndərilib", - məlumatda deyilir.
Hazırda terminalda iritutumlu tankerlərin qəbulu üçün dəniz dibinin dərinləşdirilməsi işləri aparılır. Bu da yükdaşıma həcmlərinin artmasına səbəb olacaq.
Kulevidəki neft terminalı öz işinə keçən ilin yayından başlayıb. Terminalın ümumi yükləmə gücü ildə 10 milyon ton neftdaşıma yüküdür. Bura 3 milyon ton neft, 3 milyon ton dizel yanacağı, 4 milyon ton mazut daxildir. Terminal eyni vaxtda 168-ə qədər vaqon-sistern qəbul edə bilir. Rezervuar parkının ümumi həcmi 320 min kubmetrdir. İki il ərzində terminalın buraxılış gücünün 15-20 milyon tonadək qaldırılması planlaşdırılır.
Məqalə müəllifi ilə əlaqə ünvanı: [email protected]
