Azərbaycan, Bakı, 30 sentyabr /Trend, müxbir E.İsmayılov/
Yanvar-avqustda "Azərbaycan Dəmir Yolları" QSC səkkiz milyon ton neft məhsulu nəql edib ki, bu da ötən ilin analoji dövr göstəricisindən 26 faiz çoxdur. Bu barədə cümə axşamı QSC-dəki mənbə bildirib.
Onun sözlərinə görə, bu dövrdə nəql olunan neft məhsulları yüklərinin ümumi həcmindən 4,4 milyonu Qazaxıstan və Türkiyədən olan tranzit yüklərin payına düşüb.
Yanvar-avqustda QSC 9,97 milyon ton yük göndərib ki, bu da ötən ilin yanvar-avqust ayındakı göstəricidən 19 faiz çoxdur.
Bu dövrdə nəql olunan yüklərin ümumi həcmindən tikinti materiallarının payına 1,3 milyon ton düşüb.
Yüklərin nəqlində artım əsasən neft məhsulları yüklərinin və daxili quru yüklərin (tikinti materialları) daşınmasının artması sayəsində müşahidə olunur.
Yükdaşımalarda artıma baxmayaraq, dəmiryolda sərnişindaşımaların həcminin, xüsusən, Rusiya istiqamətində azalması müşahidə olunur. Bu, Dağıstan ərazisindən keçən dəmiryol hissəsində partlayışlarla izah edilir. Yanvar-avqust ayının yekunlarına görə, dəmiryol nəqliyyatı ilə 3,3 milyon sərnişin daşınıb ki, bu da ötən ilin analoji dövr göstəricisindən 22 faiz azdır.
