Azərbaycan, Bakı, 29 may /Trend, müxbir A.Axundov/
Xəzərin Azərbaycan sektorundakı "Şahdəniz" qaz-kondensat yatağının işlənməsinin ikinci mərhələsindən etibarən "Şahdəniz" konsorsiumu qazı münasib qiymətlərlə təklif edəcək.
Trend-in məlumatına görə, bu barədə çərşənbə günü ARDNŞ-nin (Azərbaycan Respublikası Dövlət Neft Şirkəti) sərmayələr və marketinq üzrə vitse-prezidenti Elşad Nəsirov "Gələcəyə baxış" Azərbaycan-ABŞ Forumu çərçivəsində "Enerji təhlükəsizliyi - Xəzər dənizindən Avropaya doğru: dəyişən dünyanın enerji təhlükəsizliyinin dinamikası: Cənubi Enerji Dəhlizinin yeni perspektivləri" sessiyasında çıxışı zamanı bildirib.
Nəsirov qeyd edib ki, alternativ qaz əsas mənbədən ucuz olmur: "Məsələn, 2009-cu ildə Rusiya Ukrayna və Bolqarıstana qaz tədarükünü dayandırdığı zaman onları Yunanıstandan sıxılmış qaz xilas etdi. Yeri gəlmişkən, onun dəyəri iki dəfə baha idi. Lakin bu o demək deyil ki, "Şahdəniz" qaz yatağının ikinci mərhələsinin işlənməsi üzrə konsorsium da yüksək qiymətlər təyin edəcək. Bizim avropalıları yüksək qiymətlərlə sıxışdırmaq məqsədimiz yoxdur".
Onun sözlərinə görə, konsorsium üç-dörd həftə ərzində qazın qiyməti ilə bağlı qərar verəcək.