Azərbaycan, Bakı, 4 iyun /Trend, müxbir E.İsmayılov/
Azərbaycanda yanacağa artan tələbatı qarşılamaq üçün yeni emal güclərinin yaradılması prosesi sürətləndirilməlidir. Trend-in məlumatına görə, bunu çərşənbə günü jurnalistlərə Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev deyib.
Onun sözlərinə görə, ölkədə neft məhsullarının istehlakının xeyli artımı 2017-ci idə gözlənilirdi, lakin Azərbaycan iqtisadiyyatının fenomenal artımı nəticəsində ölkədə benzin istehsalı və istehlakı həcmləri artıq 2013-cü ildə eyni səviyyəyə çatdı.
Azərbaycanın fəaliyyətdə olan neft emalı zavodlarının (NEZ) ilkin neft emalı gücləri təqribən 10 milyon tondur, daha dərin emalın maksimum həcmi isə 93 faiz dərinlikdə olmaqla 7 milyon ton səviyyəsindədir.
R.Abdullayev bildirib ki, emal həcmlərinin artırılması zamanı bu dərinliyi saxlamaq mümkün olmayacaq: "Müvafiq olaraq, əlvan neft məhsullarına artan tələbatı təmin etmək üçün Heydər Əliyev adına Bakı neft emalı zavodunda modernləşmə və yenilənmə işləri aparılıb və aparılacaq. Bundan başqa, artan tələbatı qarşılamaq üçün yeni emal kompleksinin, 2023-cü ilə tədricən istismara verilməsi planlaşdırılan müəssisənin yaradılması prosesini sürətləndirmək lazımdır".
ARDNŞ prezidentinin sözlərinə əsasən, Azərbaycanda neft-qaz emalı və neft-kimya məhsullarının istehsalı üzrə yeni kompleksin (OGPG) yaradılması ilə əlaqədar 200 konfiqurasiya variantı nəzərdən keçirilib: "Bu halda ən vacib olanı düzgün konfiqurasiyanın seçilməsidir".
