Azərbaycan, Bakı, 10 iyun /Trend, müxbir Z.Qurbanova/
Azərbaycan iqtisadiyyatına birbaşa investisiyalar formasında xaricdən cəlb olunmuş sərmayələrin ümumi məbləği 1,9 milyard dollar olub. Bu investisiyaların strukturunda neft-qaz sektorunun xüsusi çəkisi 86,3% təşkil edib. Trend-in məlumatına görə, bu barədə Mərkəzi Bankın açıqladığı 2014-cü ilin yanvar-mart ayları üçün Azərbaycanın tədiyyə balansında deyilir.
Cəlb olunmuş sərmayələr iri neft-qaz layihələrinin, əsasən, BP Eksploreyşn (Şahdəniz) Ltd. layihəsi və Azərbaycan Beynəlxalq Əməliyyat Şirkətinin "Azəri-Çıraq-Günəşli" yatağında görülən işlərin maliyyələşdirilməsi ilə əlaqədar ölkə iqtisadiyyatında istifadə olunub.
Qiymətləndirmələrə görə, qeyri-neft sektoruna cəlb olunmuş birbaşa investisiyaların ümumi məbləği 261,1 milyon dollar olub. Bu da ölkəyə cəlb olunmuş birbaşa xarici investisiyaların ümumi həcminin 13,7%-ni təşkil edib.