Azərbaycan, Bakı, 24 dekabr/ Trend , müxbir S.Babayeva/ Azərpoçt Dövlət Müəssisəsinin (DM) 76 poçt şöbəsi Azərbaycan Milli Bankının yaratdığı milli kommunal ödənişlər sisteminə qoşulub, - Azərbaycanın Rabitə və İnformasiya Texnologiyaları Nazirliyindən çərşənbə günü bildiriblər.
İyulda işə salınan sistem vasitəsilə elektrik enerjisi, su və qazdan istifadəyə görə ödənişlərin yığılması həyata keçirilir.
Rabitə Nazirliyinin gələcək planlarına bu sistemin regional poçt şöbələrində tətbiqi daxil olsa da, texniki problemlərə görə bunu yerinə yetirmək daha çətin olacaq.
Yeni sistemin tətbiqindən sonra kommunal ödənişlərin yığılması prosesi daha səmərəli şəkildə və sürətlə həyata keçiriləcək, -- DM - dən bildiriblər.
Sistem abunəçilərə kommunal ödənişləri həm nəqd pulla bank və poçt şöbələri və filiallarında, həm də nəqdsiz formada bankomatlar, POS - terminallar, internet - bankinq vasitəsilə həyata keçirmək imkanının təqdim edilməsinə yönəlib.
Azərpoçt DM - in strukturuna 59 poçtamt, iki poçt müəssisəsi, iki törəmə müəssisə və səkkiz rabitə qovşağı daxildir.
DM - in tərkibində ölkənin bütün yaşayış məntəqələrini əhatə edən 1,3 mindən çox poçt şöbəsi fəaliyyət göstərir.