Azərbaycan, Bakı, 13 dekabr /Trend, müxbir H.Vəliyev/
"Xalq kompüteri" layihəsi çərçivəsində 9961 şəxsi kompüter satılıb. Bu barədə bazar ertəsi Trend-ə "Best Comp Group" şirkətindən məlumat verilib.
Satılan texnikanın 89,1 faizi portativ qurğuların payına düşür. Layihə çərçivəsində 110 netbuk, 8761-ə yaxın noutbuk və 1090 stolüstü kompüter satılıb.
Həmin kompüterlərin ümumi sayından 1819 ədəd Bakıda, qalanları isə regionlarda satılıb. 9901 kompüter müəllimlər, 58-i şagirdlər və tələbələr, iki kompüter isə səhiyyə işçiləri tərəfindən alınıb.
"Xalq kompüteri" layihəsinə beş milyon manatdan çox sərmayə yatırılıb.
Layihə ötən ilin aprelində başlayıb. "Xalq kompüteri" layihəsi çərçivəsində təklif olunan kompüterlər bazar qiymətindən 25-40 faiz aşağı olmaqla, 12 aya qədər müddətlə faizsiz kredit şərtləri ilə həyata keçirilir.
Layihə HP və Microsoft şirkətlərinin iştirakı ilə həyata keçirilir. Texnika HP-nin yerli tərəfdaşı olan "Best Comp Group" şirkəti tərəfindən təchiz olunur.
