Azərbaycan, Bakı, 29 mart /Trend, müxbir H.Vəliyev/
Azərbaycan Milli Elmlər Akademiyasının (AMEA) Trans-Avropa Tədqiqat və Təhsil Şəbəkəsi Assosiasiyasına (TERENA) üzvlüyü ölkəyə bir sıra üstünlüklər verəcək. Trend-in məlumatına görə, bu barədə çərşənbə axşamı TERENA-nın texniki direktoru Valentino Kavalli bildirib.
Kavallinin sözlərinə görə, yeni texnologiyalara, resurs və xidmətlərə çıxışla yanaşı, AMEA güzəştli əsasda rəqəmli sertifikatlar ala biləcək. Sertifikatlar VEB-serverlərin və serverlərlə birləşmə quran istifadəçilərin uzaqda yerləşən kompüterlərinin eyniləşdirilməsini təmin edir.
"Şübhəsiz ki, bu gün bazarda bu tip xidmətlər təklif edən şirkətlər az deyil, lakin problem onların təqdim etdikləri sertifikatların tam məhdudlaşdırılması və qiymətlərinin hamı üçün sərfəli olmamasındadır. Biz sertifikatlara fiksajlanmış qiymət təklif edirik. Rəqəmli sertifikatların olması "Elektron hökumət"in yaradılması layihəsinə cəlb edilmiş ölkə üçün xüsusi əhəmiyyət kəsb edir", - Kavalli bildirib.
Azərbaycan Milli Elmlər Akademiyası 2010-cu ilin avqustunda TERENA-nın tamhüquqlu üzvü seçilib.
Avropa ölkələrinin akademik tədqiqat mərkəzləri və universitetlərinin şəbəkəsini əhatə edən TERENA milli elektron elm və təhsil sahələri əsasında vahid qlobal məkanın yaradılmasına yardım edən, eləcə də elm və təhsilin maraqlarına cavab verən yüksəkkeyfiyyətli beynəlxalq məlumat-telekommunikasiya infrastrukturunun yaradılmasına kömək edən transmilli strukturdur.
Azərbaycanın TERENA-dakı statusu Avropanın elmi cəmiyyətlərinin həyata keçirdiyi layihələrdə iştirak etməyə imkan verir. Həmin layihələrdən biri baza optik-lif şəbəkəsinin buraxılış qabiliyyətinin gələcəkdə artırılmasını nəzərdə tutan GEANT 3-dür.
AMEA-nın akademik şəbəkəsi Avropanın ümumi elmi şəbəkəsi GEANT 2-yə 2009-cu ilin payızında qoşulub. Perspektivdə akademik şəbəkə təkcə kanalların daxili buraxılış qabiliyyətinin artırılması yolu ilə deyil, eləcə də digər ölkələrin elmi-təhsil müəssisələri ilə qarşılıqlı optik-lif şəbəkəni təmin etmək sayəsində genişləndiriləcək.
