Bakı. Trend:
Beynəlxalq ekspertlər xəbərdarlıq ediblər ki, Google, Microsoft, Amazon, IBM və Alibaba kimi texnologiya şirkətləri süni intellekt və alqoritmlərdən istifadə edərək, fermerlərin nə yetişdirəcəyini və necə yetişdirəcəyini müəyyən etməyə çalışır.
Trend bu barədə xarici KİV-ə istinadən xəbər verir.
Hesabata görə, bu “yuxarıdan aşağıya” yanaşma fermerləri yalnız məhsuldar və gəlirli bitkilərə yönəldir, yerli və müxtəlif növ əkinçilik riskə atılır. Ekspertlər bildirib ki, fermerlər qloballaşan sistemə bağlı qalaraq yerli toxum və ənənəvi əkinçilik təcrübələrini itirə bilərlər.
Süni intellekt alətləri peyk və dron sensorlarından toplanan məlumatlarla fermerlərə tövsiyələr verir, lakin bu tövsiyələr şirkətlərin maraq göstərdiyi məhsullara yönəlir. Hesabat fermerləri yerli bilik və ehtiyaclarına əsaslanan “aşağıdan yuxarıya” yanaşmaya çağırır və qida təhlükəsizliyinin mümkün qədər lokal olması zərurətini vurğulayır.
Qeyd edilib ki, texnologiya şirkətlərinə şərh üçün müraciət edilib, lakin hələ cavab verilməyib.