Bakı. Trend:
Yüzlərlə miqrant əleyhinə etirazçı cümə axşamı axşam saatlarında Madriddəki Mərakeş səfirliyi qarşısında toplaşaraq, Mərakeşlə həmsərhəd olan İspaniyanın Seuta anklavında davam edən miqrasiya axınını "işğal" adlandıraraq etiraz edib.
AFP agentliyinin hadisə yerində olan müxbirinin verdiyi məlumata görə, əsasən qara geyimdə olan etirazçılar "İspaniya xristiandır, müsəlman deyil!" və "Milli birlik!" şüarları səsləndiriblər. Yürüşün ön sıralarında bəzi iştirakçılar Avropadakı bir çox ifrat sağçı siyasi qüvvələr tərəfindən təbliğ edilən "Remiqrasiya" konsepsiyasını əks etdirən böyük banner nümayiş etdiriblər.
Digər etirazçılar İspaniyanın qırmızı-sarı dövlət bayraqlarını qaldırıb, "İspan kimliyinin müdafiəsi" ilə bağlı şüarlar səsləndiriblər. Bir neçə aksiya iştirakçısı üzünü gizlətmədən nasist salamını xatırladan jest nümayiş etdirib.
Miqrasiya məsələsində Avropanın bir çox ölkəsindən fərqli olaraq daha açıq siyasət yürüdən İspaniyanın sosialist baş naziri Pedro Sançes də etirazçıların təhqirlərinin hədəfinə çevrilib.
Aksiya zamanı Mərakeş səfirliyi qarşısında gücləndirilmiş polis nəzarəti təşkil olunub. Təhlükəsizliyin təmin edilməsi üçün əraziyə çoxsaylı polis qüvvələri cəlb edilib, həmçinin müşahidə helikopteri və pilotsuz uçuş aparatı istifadə olunub.
Saat 20:30-da başlayan etiraz aksiyası təxminən bir saat sonra insidentsiz başa çatıb.
