Bakı. Trend:
Almaniyanın Kalv şəhərində uşaqların istifadə edə biləcəyi qeyri-adi nəqliyyat vasitəsi yaradılıb. Sentyabrın 18-dən etibarən ölkənin cənub-qərbində, Baden-Vürtemberq əyalətində yerləşən bu şəhərdə iki sürüşkən istifadəyə veriləcək. Onlar, xüsusilə, məktəbə gedib-gəlmə müddətini qısaltmağa imkan verəcək. Belə ki, sürüşkənlər hündürlükdə yerləşən Vimberg rayonunu (iki məktəbin yerləşdiyi ərazi) aşağıda yerləşən şəhər mərkəzi ilə birləşdirəcək.
Bu vasitədən uşaqlarla yanaşı, tələbələr və işləyən şəxslər də istifadə edə biləcəklər. Belə ki, təpədən aşağı düşərək Kalv şəhərinin mərkəzinə çatmaq üçün birbaşa yolun olmaması səbəbindən sürüşkənlər şəhər mərkəzinə gedişi asanlaşdıracaq.
Bu ideya 2022-ci ildə şəhərin bağının yenidən qurulması ilə bağlı keçirilən vətəndaş forumunda irəli sürülüb. Yerli SWR radiosunun məlumatına görə, iki sürüşkənin uzunluğu müvafiq olaraq 43 və 17 metr olacaq və Kalv şəhərinin yeddi hektar ərazini əhatə edən bələdiyyə parkının yamacına uyğun şəkildə quraşdırılacaq.
“Bu, böyük bir çağırış idi”, - deyə memar Patrik Humpert SWR-ə açıqlamasında bildirib. Şəhər sakinlərinin gündəlik həyatını asanlaşdırmalı olan bu layihə olduqca mürəkkəb şəraitdə həyata keçirilib. “Kiçik texnika ilə əraziyə giriş son dərəcə çətindir”, - deyə o, Kalv şəhərinin Qara Meşənin şimalındakı dağlıq ərazidə yerləşdiyini qeyd edərək bildirib.
Almaniyanın Schwarzwälder Bote qəzetinin məlumatına görə, paslanmayan poladdan hazırlanan iki qurğunun ümumi dəyəri təxminən 150 min avrodur. Onların quraşdırılması büdcəsi təxminən 1,5 milyon avro olan bələdiyyə bağının tamamilə yenidən qurulması planının bir hissəsidir. İşlər ekoloji keçidi sürətləndirmək məqsədi daşıyan layihə müsabiqəsi çərçivəsində ayrılmış vəsait hesabına maliyyələşdirilib.
