Rusiya Mərkəzi Seçki Komissiyasının sədri Aleksandr Veşnyakov Avropa Birliyi ölkələrində vahid parlament seçkiləri standartlarının qəbul edilməsini vacib hesab edir. Trend agentliyi "RBK"-ya istinadən xəbər verir ki, mərkəzi seçki komissiyaları nümayəndələrinin "Beynəlxalq seçki standartlarının inkişafı və kodlaşdırılması" adlı 3-cü Avropa konfransında çıxış edən A.Veşnyakov bildirib ki, 2006-ci il mayın 19-dan Rusiya Avropa Şurası Nazirlər Komitəsinin sədri olub. Həmin iclasda 24 Avropa və MDB ölkələri seçki komissiyalarının, eləcə də beynəlxalq təşkilatların nümayəndələri iştirak edib.
O vurğulayıb ki, bu gün seçki hüququ sahəsində beynəlxalq normaların kodlaşdırılması məsələsi aktualdır. Onun sözlərinə görə, hələ 2002-cı ildə Mərkəzi və Şərqi Avropa Ölkələri Seçki Təşkilatçılarının Assosiasiyası demokratik seçkilər, seçki hüququ və azadlığının demokratik standartları haqqında Avropa konvensiyasının layihəsini hazırlayıb.
O xatırlayıb ki, 2003-cü il yanvarın 30-da AŞPA seçkilərin keçirilmə qaydalarının kodlaşdırılması təşəbbüsünü üzərinə götürdüyü haqqında qətnamə qəbul edib. Lakin A.Veşnyakovun dediklərinə görə, həmin layihənin vaxtından əvvəl qəbul olunduğu bildirildi və bu sahədə heç bir iş görülmədi.