Bakı. Trend:
Bu ilin 3-8 iyun tarixlərində Bolqarıstanın Sozopol şəhərində
keçirilən “Soleil” Beynəlxalq Frankofoniya Festivalı çərçivəsində
Azərbaycanın Şuşa şəhərinin tarixi-mədəni irsinin təbliği məqsədilə
“Xarı bülbül – məhəbbət və sülhün rəmzi” və “Şuşa – Azərbaycanın
mədəniyyət irsinin incisi” adlı rəsm və foto sərgiləri, həmçinin
musiqili-ədəbi gecəsi təşkil olunub.
Trend xəbər verir ki, Bakı Media
Mərkəzinin dəstəyi və Azərbaycanın Bolqarıstandakı səfirliyinin
təşkilatçılığı ilə keçirilən “Şuşa– Azərbaycanın mədəniyyət irsinin
incisi” adlı rəsm və fotosərgisində Azərbaycanın mədəniyyət
paytaxtı Şuşa şəhərinin füsunkar təbiətini, qədim tarixini və
zəngin mədəniyyətini təcəssüm etdirən rəsm və fotoşəkillər nümayiş
etdirilib.
Tədbirdə çıxış edən Azərbaycanın Bolqarıstandakı səfiri Hüseyn
Hüseynov Şuşa şəhərinin Azərbaycanın tarixi vəmədəniyyətində
tutduğu əvəzsiz yeri barədə danışıb, torpaqlarının 30 illik
işğaldan azad olunması və onları bərpa edərək orada mədəniyyət
incilərini yenidən tərənnüm edən Azərbaycan xalqının əzmkarlığı,
həmçinin zəngin müxtəlifliyiilə seçilən Azərbaycan mədəniyyəti
barədə ətraflı məlumat təqdim edib.
Azərbaycan Respublikasının Bolqarıstandakı səfirliyinin dəstəyi və
Bakı Slavyan Universitetinin Müqəddəs Kliment Oxridski adına Sofiya
Universiteti nəzdində fəaliyyət göstərən Azərbaycan Dili və
Mədəniyyəti Mərkəzinin təşkilatçılığı ilə sərgilənən “Xarı bülbül –
məhəbbət və sülhün rəmzi” rəsm sərgisində Bolqarıstanın incəsənət
məktəblərinin şagirdləri tərəfindən xarı bülbülü təsvir edən rəsm
nümunələri nümayiş etdirilib və Azərbaycan Dili və Mədəniyyəti
Mərkəzinin direktoru Sofiya Şıqayeva-Mitreska tərəfindən
Azərbaycanın Şuşa bölgəsində bitən endemik xarı bülbül gülünün
Azərbaycan xalqı arasında sevgi və sülh nişanı olması ilə yanaşı,
44 günlük Vətən Müharibəsi dövründə xalqımızın şanlı zəfərinin
rəmzinə çevrildiyinə dair məlumat verilib.
Sərgilərin açılışından sonra Azərbaycanın əməkdar artisti Turan
Manafzadənin ifası ilə milli və klassik musiqi əsərləri, həmçinin
xanım Şıqayeva-Mitreskanın Azərbaycan və bolqar dillərində
səsləndirdiyi Azərbaycanın Qarabağ bölgəsinin şairələri Ağabəyim
ağa və Xurşidbanu Natəvanın şeirlərindən ibarət musiqili-ədəbi
gecəsi keçirilib.
Tədbirdə Sozopol şəhərinin meri, Bolqarıstanda akkreditə olunmuş
diplomatik nümayəndəliklərin başçıları və üzvləri, mədəniyyət və
ictimai xadimlər, yerli sakinlər və qonaqlar, həmçinin media
nümayəndələri iştirak ediblər.
“Soleil” Beynəlxalq Frankofoniya Festivalında Azərbaycanın Şuşa
şəhərinin tarixi-mədəni irsinə dair təşkil olunmuş tədbirlər
iştirakçılar tərəfindən yüksək maraqla qarşılanıb və yerli media
tərəfindən geniş işıqlandırılıb.
