Azərbaycan, Bakı, 04 fevral / Trend , müxbir S.İlhamqızı/Azərbaycan Milli İstiqlal Partiyasının bu ilin oktyabrında Azərbaycanda keçiriləcək prezident seçkisində iştirak edib-etməməklə bağlı qərarı apreldə qəbul olunacaq. Bu barədə bazar ertəsi Trend ə AMİP-in baş katibi, hazırda sədrin səlahiyyətlərini icra edən Fuad Muxtarov məlumat verib.
AMİP sədri Ayaz Rüstəmov ötən ilin sonunda vəzifəsindən istefa verib. AMİP-in Siyasi Şurasının fevralın 2-də keçirilən iclasında Rüstəmovun istefa ərizəsi qəbul olunub və o, rəsmən sədrlikdən uzaqlaşıb. Siyasi Şura həmçinin partiyanın Mərkəzi Şurasının iclasını çağırıb və vaxtını fevralın 17-nə təyin edib.
Muxtarov bildirib ki, fevralın 17-də keçiriləcək toplantıda AMİP-in qurultayı çağırılacaq. Qurultayda AMİP-in yenti sədri seçiləcək. Həmçinin partiyanın prezident seçkisində iştirak edib-etməməsi barədə qərar çıxarılacaq.
"AMİP-də prezident seçkisi ilə əlaqədar qrup yaradılıb. Qrup ölkədə seçkiöncəsi vəziyyəti, seçkidə iştirak imkanlarını araşdırıb öz təkliflərindən ibarət sənəd hazırlayacaq və qurultaya təqdim edəcək. Qurultayda həmin təkliflər səsverməyə çıxarılacaq və səsvermənin nəticəsində partiyanın seçkidə iştirak edib-etməyəcəyi məlum olacaq"-deyə Muxtarov bildirib.
Onun sözlərinə görə, qurultay Mərkəzi Şuranın iclasından sonra 45 gün ərzində keçirilməlidir, buna görə də AMİP-in 8-ci qurultayı aprel ayına təsadüf edir.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir. O, 2003-cü ildə keçirilmiş prezident seçkisində iştirak etmiş və qazandığı səslərə görə səkkiz nəfər namizəd arasında 4-cü yeri tutmuşdu.