Azərbaycan, Bakı, 7 fevral /Trend, müxbir E.Tariverdiyeva/
Azərbaycanla Aİ arasında assosiativ saziş üzrə danışıqların növbəti mərhələsi martın ortalarında Brüsseldə keçiriləcək. Bu barədə Trend-ə Azərbaycanın xarici işlər nazirinin müavini Mahmud Məmmədquliyev bildirib.
"Bu yaxınlarda Bakıda Aİ ilə assosiativ saziş üzrə danışıqların növbəti mərhələsi keçirilib. Bundan əlavə, Avropa Komissiyası ilə assosiativ sazişlə bağlı məsələlər üzrə kifayət qədər müntəzəm mətbuat konfransları keçiririk", - o, bildirib.
Azərbaycanla Aİ arasında assosiativ saziş üzrə danışıqların bundan əvvəlki mərhələsi yanvarın 25-26-da Bakıda keçirilib.
İlk danışıqlar ötən ilin iyulunda Bakıda, növbəti danışıqlar oktyabrda Brüsseldə keçirilib.
Ötən ilin mayında Azərbaycanla Aİ arasında münasibətlər yeni mərhələyə - Aİ-nin təşəbbüskarı Polşa və İsveç olan "Şərq tərəfdaşlığı" proqramı çərçivəsində əməkdaşlığa keçib.
"Şərq tərəfdaşlığı" Aİ-nin altı postsovet ölkəsi - Azərbaycan, Ermənistan, Gürcüstan, Moldova, Belarus və Ukrayna ilə siyasi və iqtisadi yaxınlaşmanı nəzərdə tutur. Proqram Aİ-yə üzvlüyün mümkünlüyünü deyil, lakin viza rejiminin sadələşdirilməsini, enerji sahəsində əməkdaşlığı, sərbəst ticarət zonalarının yaradılmasını nəzərdə tutur. Eləcə də tələbə mübadiləsi, ətraf mühitin müdafiəsi, enerji təchizatı üzrə kiçik layihələr həyata keçiriləcək.