Böyük Quruluş Partiyası (BQP) siyasi kursunda dəyişiklik edəcək. Bu barədə Trend ə BQP sədri, millət vəkili Fazil Qəzənfəroğlu bildirib.
F.Qəzənfəroğlu qeyd edib ki, bu dəyişiklik liberal-demokratik xəttə üstünlük verməklə həyata keçiriləcək və partiyanın yay aylarında planlaşdırılan növbəti qurultayında rəsmiləşdiriləcək. Qurultaya hazırlıqla bağlı təşkilat komitəsinin yaradıldığını deyən millət vəkili qurultayda BQP-nin məramnaməsinə dəyişikliklər ediləcəyini söyləyib. Bununla bağlı isə məsləhətləşmələr aparılır.
F.Qəzənfəroğlu onu da vurğulayıb ki, partiyanın yeni rayon təşkilatları yaradılır və qurultaya hazırlıqla bağlı yerlərdə konfranslar keçirilir: "Qurultayımızı iyun ayına planlaşdırmışıq. Ancaq bəzi texniki məsələlərlə bağlı tarix dəyişdirilə də bilər". Partiya sədri daha sonra bildirib ki, qurultayda Ali Məclis formalaşdırılacaq və müavinlik institutu yaradılacaq.