Ağdam rayonundan məcburi köçkünlər Bərdə - Ağdam maqistral avtomobil yolunun Dördyol deyilən hissəsini 30 dəqiqəyə yaxın bağlayıblar. Trend in bölgə müxbiri xəbər verir ki, aksiya iştirakçılarının tələbi onlara 7 gündən bəri işıq verilməməsidir.
Aksiya iştirakçıları iddia edirlər ki, işıq gun ərzində cəmi 1-2 saat yanır. Bununla bağlı aidiyyəti orqanlara dəfələrlə müraciət etsələr də, vəd verib ancaq sözlərini yerinə yetirmirlər.
Aksiyanı Ağdam və Tərtər rayon polis şöbələrinin əməkdaşları dağıtdıqdan sonra Ağdam rayon İcra Hakimiyyətinin başçısı Həsən Sarıyev aksiya iştirakçıları ilə görüşərək bildirib ki, onlara gələn elektrik xətti Bərdə Rayon Elektrik Paylayıcı Şəbəkəsindən çıxarılıb və Ağdam rayon paylayıcı şəbəkəsinə qoşulub. İH başçısı işıqlarının davamlı yanacağına söz verib.
Qeyd edək ki, ötən gün axşam saat 20:00-dan başlayaraq həmin istiqamətdə avtomobil yolunu isə Tərtər rayonunun Mamırlı kəndində yaşayan Ağdam və Laçın köçkünləri 20 dəqiqəyə yaxın bağlıyıblar. Aksiya iştirakçıları iddia edirlər ki, artıq onların 10 günə yaxındır ki, işıqları gün ərzində cəmi 2-3 saat yanır. Bununla bağlı Tərtər rayon Elektrik Paylayıcı Şəbəkəsinə dəfələrlə müraciət etsələr də, heç bir dəyişiklik olmayıb. Aksiyada iştirak edən 100 yaxın şəxsi Tərtər rayon polis şöbəsinin əməkdaşları dağıdıb.
