Azərbaycan, Bakı, 05 dekabr/ Trend , müxbir A.Hüseynbala/Azərbaycanın Qeyri - Hökumət Təşkilatları (QHT) ilə Türkiyə QHT-lərinin əməkdaşlıq etməsi barədə razılıq əldə olunub.
"Türkiyənin İstanbul, Qars və İqdır şəhərlərində fəaliyyət göstərən Qeyri - Hökumət Təşkilatlarının nümayəndələri ilə görüşümüzdə bu məsələ ciddi müzakirə olunub, - cümə günü Trend - a Azərbaycan Milli QHT Forumunun rəhbəri Rauf Zeyni bildirib.
Trend -un arayışı: Milli QHT Forumu Azərbaycanda qeyri - hökumət təşkilatlarını birləşdirən ən böyük qurumdur. Milli QHT Forumunda 500- dən çox təşkilat təmsil olunur.
Rauf Zeyni Azərbaycan Respublikası Prezidenti yanında yaradılan Qeyri - Hökumət Təşkilatlarına Dövlət Dəstəyi Şurasına apreldə sədr seçilib və Milli QHT Forumuna rəhbərlik edir.
Onun sözlərinə görə, türk dövlətlərinin qeyri-hökumət təşkilatlarının birgə əməkdaşlığı ilə bağlı fikir mübadiləsi aparılıb: "Əməkdaşlıqla bağlı müzakirələr davam edəcək. Yaxın gələcəkdə türk dövlətləri qeyri - hökumət təşkilatlarının əlaqələndirmə şurasının yaradılması da istisna olunmur", - Milli QHT Forumunun rəhbəri vurğulayıb.
Zeyni deyib ki, nəzərdə tutlan əlaqələndirmə şurasının yaradılması bütün türk dövlətlərində QHT sektorunun, vətəndaş cəmiyyətinin inkişafını sürətləndirəcək, problemlərin birgə həllinə yardım göstərəcək.
Məqalə müəllifi ilə əlaqə ünvanı: [email protected]
