Azərbaycan, Bakı, 4 oktyabr /Trend, müxbir T.Hacıyev/
Azərbaycan Prezidenti yanında Strateji Araşdırmalar Mərkəzinin (SAM) təmsilçisi türk dövlətlərinin müstəqilliklərinin 20 illiyinə həsr olunmuş tədbirdə iştirak edəcək. Bu barədə çərşənbə axşamı Trend-ə SAM-ın mətbuat xidmətindən məlumat verilib.
Məlumatda qeyd olunub ki, SAM-ın direktor müavini Gülşən Paşayeva Ankarada Hoca Ahmet Yesevi Beynəlxalq Türk-Qazax Universitetinin təşkil etdiyi "Türk dövlətləri müstəqilliklərinin 20-ci ildönümü: Azərbaycan, Qazaxıstan, Qırğızıstan, Özbəkistan və Türkmənistan" mövzusunda keçiriləcək beynəlxalq konfransa qatılacaq.
SAM-ın direktor müavini tədbirdə "Türk dövlətləri arasında siyasi münasibətlər: Qiymətləndirmə, problemlər və təkliflər" panelində əsas məruzəçi qismində çıxış edəcək.
Tədbirin keçirilməsində məqsəd keçmiş dövrün əsas problemlərinin elmi təhlilinin aparılması və bu mövzuda həyata keçirilmiş layihələrin nəticələri ilə tanışlıqdır.