Bakı. Trend:
Bakı İqlim Fəaliyyəti Həftəsinin (Baku Climate Action Week 2025) 3-cü günü start götürüb.
Trend xəbər verir ki, tədbirdə çıxış edən COP29 prezidenti,Azərbaycan Respublikası Prezidentinin iqlim məsələləri üzrə nümayəndəsi Muxtar Babayev Azərbaycanın iqlim gündəliyinin prioritetlərini açıqlayıb. O qeyd edib ki, kənd təsərrüfatı iqlim dəyişiklikləri qarşısında ən həssas sahələrdən biridir və su ehtiyatları ilə Xəzərin ekoloji problemləri təcili diqqət tələb edir.
Muxtar Babayevin sözlərinə görə, Azərbaycan tərəfindən irəli sürülmüş su və iqlim fəaliyyətlərinə dair COP29 Bəyannaməsinə artıq 60-dan çox ölkə qoşulub. Bu təşəbbüs çərçivəsində beynəlxalq əməkdaşlığın möhkəmləndirilməsinə yönəlmiş Su və İqlim üzrə Bakı Dialoqu işə salınıb.
Kənd təsərrüfatı naziri Məcnun Məmmədov çıxışda bildirib ki, Azərbaycan kənd təsərrüfatı üçün süni intellekt üzrə rəqəmsal yol xəritəsi hazırlayır.
Onun sözlərinə görə, Süni İntellekt üzrə yol xəritəsinə 30-dan çox praktiki həllər (torpağın monitorinqindən və bitki sortlarının xəritələnməsindən tutmuş məhsuldarlığın proqnozlaşdırılması və suya qənaət edən suvarmaya və s.) daxildir.
“Smart kənd təsərrüfatı dayanıqlı su və torpaq idarəçiliyi ilə birlikdə olmalıdır. Biz hər damla suyu qorumaq üçün suvarma sistemlərinin müasirləşdirilməsinə sərmayə qoyuruq”,- deyə Məmmədov vurğulayıb.
Qeyd edək ki, 2024-cü ildə COP29-un sədrliyi Londonla tərəfdaşlıq çərçivəsində COP29-un 2024-cü ilin noyabrında keçiriləcəyi ərəfədə bütün cəmiyyəti səfərbərliyə çağıran oxşar bir tədbir kimi ilk Bakı İqlim Fəaliyyəti Həftəsini uğurla təşkil edib.
Xəbər yenilənəcək
