...

Azərbaycan karateçiləri rekord nəticə qazanıblar (FOTO)

İdman Materials 9 Fevral 2020 00:40
Yeniyetmə və Gənclərdən ibarət Azərbaycan seçmə komandası Macarıstanın paytaxtı Budapeştdə növbəti Avropa çempionatının ikinci yarış günü ötən illərki statistik göstəricilərini yeniləyərək rekord nəticə qazanıblar
Azərbaycan karateçiləri rekord nəticə qazanıblar (FOTO)

Trend-i buradan izləyin

Bakı. Trend:

Yeniyetmə və Gənclərdən ibarət Azərbaycan seçmə komandası Macarıstanın paytaxtı Budapeştdə növbəti Avropa çempionatının ikinci yarış günü ötən illərki statistik göstəricilərini yeniləyərək rekord nəticə qazanıblar.

Azərbaycan Milli Karate Federasiyasından Trend-ə verilən məlumata görə, 16-17 yaşlı gənclər arasında Sultan Hüseynov (-55 kq, şəxsi məşqçisi Rəşad Hüseynov), Fərid Ağayev (-76 kq, şəxsi məşqçisi Namiq Priverdiyev) və Osman Osmanlının (+76 kq, şəxsi məşqçisi Rövşən Allahverdiyev) Avropa çempionluğu, Ayla Rzazadənin (-59 kq, şəxsi məşqçisi Seymur Xudaverdiyev) gümüş medala, Əminağa Quliyevin (-61 kq, şəxsi məşqçisi Elnur Həsənov) isə bürünc mükafata sahib olması, həmçinin bir gün əvvəl 14-15 yaşlı yeniyetmələrdə Fərid Savadovun (-57 kq) birinci yerə çıxması ötən rekordları yeniləyib. Tale Yaqubov (-68 kq, şəxsi məşqçisi Cahangir Babayev) bürünc medal uğrunda həlledici görüşdə məğlub olub.

Yeniyetmə və gənclər seçmə komandasının baş məşqçisi Anar Allahverdiyev hələki yarışın iki günündə nəticənin digər qitə çempionatlarında əldə edilən göstəricilərdən bir gümüş medal fərqi ilə üstün olduğunu bildirib. Əməkdar məşqçi yarışın son günü 18-21 yaşlı gənclər arasında çıxışlarda Dünya və Avropa çempionları və mükafatçılarımızın da olduğunu və daha yüksək nəticə gözlənildiyini söyləyib.

Hazırda Azərbaycan karateçiləri 52 ölkə arasında ümumi komanda hesabında Türkiyədən sonra 4 qızıl, 1 gümüş və bürünc medalla 2-ci yeri tuturlar. A.Allahverdiyev həmçinin qeyd edib ki, idmançılarımız bütün medalları ilk pillənin sahibindən fərqli olaraq katada yox, məhz kumite çıxışlarında, o cümlədən fərdi mübarizədə qazanıblar. Yeniyetmə və Gənclər son 3 ildir ki, ardıcıl olaraq rekordu yeniləyirlər. Dünya Karate Federasiyasının (WKF) internet səhifəsində günün yekunlarına aid məlumatda Azərbaycan karateçilərinin uğuru qeyd edilib.

Xatırladaq ki, Yeniyetmə və Gənclərin 47-ci, 21 yaşadək karateçilərin isə 12-ci Avropa çempionatına 52 ölkədən 1155 idmançı qatılıb. Azərbaycan Milli Karate Federasiyasının prezidenti və Avropa Karate Federasiyası İdarə heyətinin üzvü Yaşar Bəşirov fərqlənən idmançıları mükafatlandırma mərasimində iştirak edib.

Məqalədə:
Xəbər lenti

Xəbər lenti