Bakı. Trend:
Azərbaycan Mərkəzi Bankı (AMB) fevral ayının 27-dən etibarən valyuta hərracları barədə məlumat yaymağı dayandırıb.
Trend valyuta hərraclarının dayandırılmasının səbəblərini öyrənmək üçün quruma sorğu ünvanlayıb.
AMB-dən Trend-in sorğusuna cavab olaraq bildirilib ki, valyuta hərraclarında formalaşan məzənnənin sabit qalması və banklar tərəfindən təqdim olunan tələbin tam qarşılanması nəzərə alınaraq, valyuta hərraclarının nəticələrinə dair məlumatın Mərkəzi Bank tərəfindən kommunikasiya edilməsi aktual hesab olunmur.
“Hazırda Mərkəzi Bankın valyuta hərraclarının həftədə iki dəfə olmaqla keçirilməsi davam etdirilir. Eyni zamanda, Mərkəzi Bankın hər ayın sonuna olan valyuta ehtiyatlarının səviyyəsinə dair məlumat Mərkəzi Bankın internet səhifəsində aylıq əsasda açıqlanır. Bu məlumatın ənənəvi qaydada kommunikasiyası davam etdiriləcək”, - deyə məlumatda bildirilib.
Qeyd edək ki, fevral ayının sonunda Mərkəzi Bankın sədrinin mətbuat nümayəndələri ilə keçirilən görüşündə media nümayəndələrinə bu barədə məlumat verilmişdi.