Azərbaycan, Bakı / Trend U.İsmaylova/ Azərbaycanın Əmək və Əhalinin Sosial Müdafiəsi Nazirliyi yanında Əmək Müfəttişliyi sentyabr-oktyabr ayları ərzində 168 tikinti şirkətində texniki təhlükəsizlik qaydaları və əmək müqavilələrinin imzamlanmasına riayət olunması üzrə yoxlamalar həyata keçirib.
Əmək Müfəttişliyi avqustda 25 nəfərin ölümü ilə nəticələnən tikilməkdə olan 16 mərtəbəli binanın uçmasından sonra işini aktivləşdirib. Hadisə yerində iş aparan ekspertlərin verdikləri məlumata görə, binanın uçması tiknti işlərinin düzgün aparılmaması, keyfiyyətsiz tikinti materiallarından istifadə olunması və texniki təhlükəsizlik qaydalarının pozulması səbəbindən baş verib.
Bu dövr ərzində 168 şirkətdə aparılan yoxlamaların 138-i Bakıda, 21-i Sumqayıt və Abşeronda, 9-u isə Gəncədə baş tutub. Yoxlamalar nəticəsində tikinti sahəsində 2061 işçi ilə əmək müqaviləsi bağlanıb.
Azərbaycan üzrə ümumilikdə istehsalat sahələrində 2149 müəssisədə 6302 əmək müqaviləsi bağlanıb, 5531 işçinin əmək müqaviləsində aylıq əmək haqqı artırılıb, qanun pozuntusunun aradan qaldırılması üzrə 807 göstəriş verilib və 13301 manat cərimə müəyyən olunub.
Ümumilikdə yanvar-noyabr ayları ərzində Azərbaycanda istehsalat sahələrində 273 bədbəxt hadisə baş verib, onlardan 100-ü ölüm, 173-ü isə müxtəlif dərəcəli ağır zədələrlə nəticələnib. Ümumilikdə 11 ay ərzində istehsalatda (yalnız tikintidə deyil) 133 nəfər həlak olub, 214 nəfər isə yaralanıb.
Tikintidə 65 bədbəxt hadisə baş verib, nəticədə 62 nəfər ölüb (istehsalatda baş verən bədbəxt hadisələrin 46,6 faizi), 44 nəfər müxtəlif dərəcəli ağır yaralar alıb.
Müfəttişliyin məlumatına görə, Azərbaycanda 800 tikinti şirkəti fəaliyyət göstərir.
