ABŞ bankı 2010-2011-ci illərdə dünya iqtisadiyyatının yüksək artımını proqnozlaşdırır

Azərbaycan, Bakı, 07 yanvar / Trend , müxbir A.Bədəlova/

ABŞ-ın Goldman Sachs bankının analitikləri 2010-2011-ci illərdə dünya iqtisadiyyatının müvafiq olaraq 4,4 və 4,5% səviyyəsində artımını proqnozlaşdırırlar.

Bankın dünya iqtisadiyyatı üzrə məruzəsinə əsasən, regionlar arasında daha çox Braziliya, Rusiya, Çin və Hindistanda (BRÇH) 2010-cu ildə 9,2%, 2011-ci ildə isə 8,6% səviyyəsində güclü iqtisadi artım müşahidə ediləcək. İnkişaf etməkdə olan ölkələrdə də 2010-cu ildə 7,7%, 2011-ci ildə isə 7,3% səviyyəsində yüksək artım müşahidə ediləcək.

Goldman Sachs-ın proqnozlarına görə, Mərkəzi və Şərqi Avropa ölkələrində ÜDM-in artımı 2010-cu ildə 2,3%, 2011-ci ildə isə 3,9% təşkil edəcək.

Asiya iqtisadiyyatı (Yaponiya istisna olmaqla) bankın proqnozlarına görə, 2010-cu ildə 9%, 2011-ci ildə isə 8,4% səviyyəsində artım nümayiş etdirəcək.

Proqnozlara görə, Türkiyənin ÜDM-i 2010-cu ildə 5,5%, 2011-ci ildə isə 4,5% artacaq. Rusiyanın ÜDM-i isə 2010 və 2011-ci illərdə müvafiq olaraq 4,5 və 5,5% təşkil edəcək.

Avropa ölkələrindən ÜDM-in 2,5%-lik ən yüksək artımı Almaniyada müşahidə ediləcək. İspaniyada isə ÜDM-in 2010-cu ildə 0,3% azalacağı gözlənilir.

Avropa ölkələri arasında ÜDM-in 3,5%-lik ən yüksək artımı 2011-ci ildə İsveçdə müşahidə ediləcək.

Goldman Sachs-ın dünya iqtisadiyyatı üzrə proqnozları digər bank və təşkilatların proqnozları ilə müqayisədə daha nikbindir.

Dünya Bankı 2010-cu ildə dünya iqtisadiyyatının 2,6% səviyyəsində, Beynəlxalq Valyuta Fondu 3,1% səviyyəsində, Amerikanın Morgan Stanley bankı isə 4% səviyyəsində artımını proqnozlaşdırır.

Goldman Sachs-ın 2010 və 2011-ci illərdə region və ölkələr üzrə ÜDM-in artım proqnozları