Bakı. Trend:
Azərbaycan Respublikasının Çin Xalq Respublikasındakı səfirliyində Ulu Öndər Heydər Əliyevin anadan olmasının 101-ci ildönümü münasibətilə dahi liderin doğma dilimiz haqqında söylədiyi kəlamlar əsasında hazırlanan “Xalq öz dili ilə yaranır” adlı Azərbaycan dili dərsliyinin Çin dilindəki nəşrinin təqdimatı olub.
Pekindəki diplomatik korpusun təmsilçilərinin, Çin Xarici Dillər
Nəşriyyatının rəsmilərinin, Çinin nüfuzlu ali təhsil ocaqlarının
müəllim və tələbələrinin, Çində təhsil alan və çalışan
azərbaycanlıların iştirak etdikləri tədbirdə əvvəlcə Ulu Öndərin
səfirlikdəki büstü önünə gül dəstəsi qoyulub, xatirəsi anılıb.
Azərbaycanın Çindəki səfiri Bünyad Hüseynov həyatını qüdrətli
Azərbaycan dövlətinin qurulmasına və inkişafına həsr edən Heydər
Əliyevin müasir tarixə müdrik rəhbər, böyük strateq və qlobal
düşüncəli siyasi lider kimi düşdüyünü, dahi liderin Azərbaycan
xalqını və dövlətini tarixin ağır və sərt sınaqlarından
çıxardığını, işıqlı sabahın etibarlı bünövrəsini yaratdığını deyib.
Diplomat Ulu Öndərin istər sovet dövründə, istərsə də müstəqillik
illərində Azərbaycan mədəniyyətinin və dilinin qorunmasına,
inkişafına xüsusi diqqətlə yanaşdığını vurğulayıb. Ümummilli
Liderin qətiyyəti ilə 1978-ci ildə Azərbaycan SSR-in
Konstitusiyasında Azərbaycan dili dövlət dili kimi qeyd olunub.
Azərbaycan müstəqilliyini bərpa etdikdən sonra xalqının iradəsinə
tabe olaraq ölkə rəhbərliyinə qayıdan Heydər Əliyev Azərbaycan
dövlətçiliyini məhv olmaqdan xilas edib. Ümummilli Liderin
müdrikliyi, qətiyyəti, siyasi bacarığı və çoxillik idarəçilik
səriştəsi ilə Azərbaycanda ictimai-siyasi, sosial-iqtisadi, elmi və
mədəni həyatda əsaslı dönüş başlanıb, xalqımızın həmrəyliyi və
milli birliyi təmin edilib. 1995-ci ildə qəbul edilən
Konstitusiyada Azərbaycan dili dövlət dili kimi təsbit olunub.
Azərbaycan dilinin siyasi hüquqi statusunun möhkəmləndirilməsi
istiqamətində atılan addımlardan biri də Ulu Öndərin “Dövlət
dilinin tətbiqi işinin təkmilləşdirilməsi haqqında” Fərmanı olub.
Ümummilli Liderin “Azərbaycan əlifbası və Azərbaycan dili gününün
təsis edilməsi haqqında” Fərmanı Azərbaycan dilinə, onun inkişafına
dövlət qayğısının ən bariz nümunəsidir. Onun təşəbbüsü ilə hər il
avqustun 1-i Azərbaycan Əlifbası və Dili Günü kimi qeyd olunur.
Bünyad Hüseynov Azərbaycan dilinin inkişafı, onun tətbiqi sahəsinin
genişləndirilməsi və yad təsirlərdən qorunması, habelə bu dilin
saflığı, təmizliyi istiqamətində Heydər Əliyevin yeritdiyi
siyasətin hazırda Prezident İlham Əliyev tərəfindən uğurla davam
etdirildiyini diqqətə çatdırıb. Bildirib ki, bu gün Azərbaycan
Respublikası tarixi zəfərlərə imza atır, Azərbaycan xalqı öz
tarixinin şanlı səhifələrini yaşayır. Azərbaycanın ərazi bütövlüyü
və suverenliyi tam bərpa olunub. Diplomat görkəmli dövlət xadimi
Heydər Əliyevin Çin Xalq Respublikası ilə münasibətlərə verdiyi
əhəmiyyətdən danışıb, 1994-cü ildə Çinə rəsmi səfərinin iki dövlət
arasında münasibətlərin inkişafı üçün möhkəm təməl olduğunu deyib.
O, təqdimatı keçirilən dərsliyin həm Azərbaycan dilinin inkişafı və
tanınması, həm də Azərbaycan-Çin xalqlarının dostluğunun
möhkəmləndirilməsi və daha da yaxınlaşması istiqamətdə görülən
işlərə əhəmiyyətli töhfə olacağını deyib. Heydər Əliyevin Çin
xalqının əski dostu olduğunu vurğulayan Çin Xarici Dillər
Nəşriyyatı Administrasiyasının baş redaktorunun müavini xanım Çen
Şı bildirib ki, böyük şəxsiyyətin kəlamlarından ibarət Azərbaycan
dili dərsliyinin Çində çap olunması çinlilərin Heydər Əliyevə olan
xoş xatirələrini özündə əks etdirir, həm də müasir Çin-Azərbaycan
mədəni münasibətlərində yeni bir irəliləyişin olduğunu göstərir. Bu
cür layihələr xalqlarımızın bir-birini daha dərindən tanımasına,
dostluq və əməkdaşlığı möhkəmləndirməyə sövq edir. Çen Şı görkəmli
dövlət xadimi Heydər Əliyevin Çin-Azərbaycan münasibətlərinə böyük
əhəmiyyət verdiyini, hazırda Sədr Si Cinpin və Prezident İlham
Əliyevin uzaqgörən strateji rəhbərliyi altında iki ölkə
münasibətlərinin sabit və sağlam şəkildə inkişaf etdiyini bildirib.
Qeyd olunub ki, qarşılıqlı siyasi etimad günü-gündən möhkəmlənir,
müxtəlif sahələrdə əməli əməkdaşlıq nəticəsində mühüm nailiyyətlər
əldə edilir, xüsusilə “Bir kəmər, bir yol” təşəbbüsü çərçivəsində
əməkdaşlıq dərinləşir. O, “Xalq öz dili ilə yaranır” dərs
vəsaitinin Çin dilində nəşr olunmasının əhəmiyyətinə toxunaraq
çinli oxucuların Heydər Əliyevin kəlamlar vasitəsilə Azərbaycanın
rəngarəng mədəni irsinə daha dərindən bələd ola biləcəklərini
vurğulayıb.
Pekin Xarici Dillər Universitetinin (PXDU) Asiya fakültəsinin dekan müavini Qu Ciayün, Mərkəzi Millətlər Universitetinin müəllimi Molla Niyazi Turniyazi, PXDU-nun Azərbaycan dili ixtisasının birinci kurs tələbəsi Cu Tiensü yaxşı dost və tərəfdaş olan Çin ilə Azərbaycan arasında əməkdaşlığın hazırda bütün sahələrdə, o cümlədən humanitar istiqamətdə inkişaf etdiyini, Azərbaycanda Çin dili və çinşünaslığa marağın geniş vüsət aldığını, Çində isə Azərbaycan dili ixtisası üzrə kadrlar hazırlandığını diqqətə çatdırıblar. “Azərbaycan dili” dərsliyinin təkcə Çinlə Azərbaycan arasında təhsil əlaqələrinə deyil, eyni zamanda Çində Azərbaycan dilli kadrların yetişdirilməsinə, ixtisasın təşkilinə böyük yardım edəcəyini, iki xalqın humanitar əlaqələrində yeni bir səhifə açdığını vurğulayıblar.
Azərbaycan Turizm və Menecment Universitetinin prorektoru, Azərbaycan dili dərsliyinin müəllifi, professor İranə Əliyeva bildirib ki, Heydər Əliyevin dərsliyin məzmununu təşkil edən hikmətli kəlamları dərin məna, müdriklik, təcrübə və yüksək mənəviyyat nümunəsidir. Əcnəbi tələbələr Azərbaycan dilini Heydər Əliyevin kəlamlarından öyrənməklə öz lüğət ehtiyatlarını genişləndirəcək, dil biliklərini təkmilləşdirərək, eyni zamanda, Azərbaycan xalqının mədəniyyətini, tarixini və dəyərlərini daha yaxşı dərk edə biləcəklər.
Tədbirdə azərbaycanlı və çinli tələbələr Azərbaycan mahnılarını ifa ediblər. “Xalq öz dili ilə yaranır” adlı Azərbaycan dili dərsliyini Çin dilinə PXDU-nun Azərbaycan dili kafedrasının müdiri filologiya üzrə fəlsəfə doktoru Aqşin Əliyev tərcümə edib.
