Azərbaycan, Bakı, 2 dekabr /Trend, müxbir N.İsmayılova/
İslam İnkişaf Bankı (İİB) və Azərbaycan hökuməti Naxçıvanda suvarılan ərazilərin daşqınlardan müdafiəsi, modernləşdirilməsi və genişləndirilməsi layihəsi çərçivəsində kredit sazişi imzalayıblar. Bu barədə cümə günü Trend-ə Azərbaycanın İİB-də nümayəndəsi Tamerlan Tağıyev məlumat verib.
2011-ci ilin sentyabrında İİB-in İcraçı Direktorlar Şurası 64,83 milyon dollara yaxın məbləğdə maliyyələşdirməni bəyənib.
"Ötən həftə İİB-in regional direktoru Hişam Marufun rəhbərliyi ilə bankın missiyası Azərbaycanda olub. Səfər çərçivəsində kredit sazişi imzalanıb. Sənədi İİB tərəfdən Maruf, Azərbaycan tərəfdən isə Naxçıvan MR-in Baş naziri Əlövsət Baxşıyev imzalayıb", - Tağıyev deyib.
Layihənin icraçı agenti qismində Naxçıvan Dövlət Meliorasiya və Su Təsərrüaftı Agentliyi çıxış edir.
Dörd il üçün nəzərdə tutulan layihənin ümumi dəyəri təxminən 80 milyon dollar təşkil edir.
İİB-in krediti iki hissədən ibarətdir. 9,5 milyon dollar güzəştli şərtlərlə təqdim olunub: 19 il güzəştli dövr və 2,6 faiz dərəcəsi ilə dörd il müddətinə; 55,33 milyon dollar isə qeyri-kommersiya şərtləri ilə 14 il güzəştli dövr və "swop rate" dərəcəsi dörd il müddətinə.
Layihə çərçivəsində Araz çayı boyunca sahilbərkitmə tikililərinin, ikinci kanalların tikintisi və digər tədbirlərin görülməsi nəzərdə tutulub.