Azərbaycan, Bakı, 29 may /Trend, müxbir Ə.Həsənov/
Qara Dəniz Ticarət və İnkişaf Bankının (QDTİB) Azərbaycanda fəal layihələrinin sayı 46-ya çatıb. Trend-in məlumatına görə, bu barədə çərşənbə axşamı bankın vitse-prezidenti Mustafa Boran Azərbaycan bankı "Unibank" ilə kredit sazişinin imzalanması mərasimində bildirib.
"QDTİB-in Azərbaycanda kredit portfeli 116 milyon dollar təşkil edir, 2012-ci il üçün isə portfel 40 milyon dollar səviyyəsində müəyyənləşdirilib", - Boran deyib.
Bu gün bank Bakıda artıq ümumi dəyəri 27 milyon dollar (biznes mərkəzin tikintisinin maliyyələşdirilməsi üçün 22 milyon dollar, kiçik və orta biznesin kreditləşdirilməsinə isə 5 milyon dollar) olan iki kredit sazişi imzalayıb.
O, həmçinin qeyd edib ki, QDTİB kənd təsərrüfatında layihələrin maliyyələşdirilməsinə, habelə kiçik və orta biznesin inkişafına dəstək göstərilməsi üçün kredit ayırmağa hazırdır.
QDTİB Azərbaycanın 9 bankı ilə əməkdaşlıq edir.