Qazaxıstan, Astana, 10 iyul /Trend, müxbir D.Muxtarov/
Qazaxıstan taxılının İran-Cənubi Qafqaz istiqaməti üzrə ixrac həcmi Rusiya taxılının qiymətindən asılı olacaq. Bu barədə çərşənbə axşamı Trend-ə Qazaxıstan Kənd Təsərrüfatı Nazirliyinin departament direktoru xanım Anna Buts bildirib.
"Taxılımızın İran-Cənubi Qafqaz istiqaməti üzrə ixrac həcmləri ilə bağlı proqnozlara gəlincə, hər şey Rusiya taxılının qiymətindən asılı olacaq. Çünki Azərbaycan və Gürcüstan taxılı əsasən Rusiyadan alırlar və əgər o, baha qiymətə satılarsa, taxılımıza tələbat çox olacaq", - Buts deyib.
Onun sözlərinə görə, İran istiqaməti üzrə hər il ixrac həcmləri ənənəvi olaraq təqribən 1 milyon ton taxıl təşkil edir. Azərbaycan və Gürcüstan istiqamatləri üzrə isə bu rəqəm ildə təqribən 800 min ton təşkil edir.
Mövcud bazarda Rusiya buğdasının 1 tonunun qiyməti iyulun birinci ongünlüyündə 60 dollar artıb.
Belə ki, Rusiya Kənd Təsərrüfatı Nazirliyinin proqnozlarına əsasən, cari ildə taxıl məhsuldarlığı 85 milyon ton səviyyəsində qiymətləndirilir ki, bu da 2011-ci ilin səviyyəsindən 10 milyon ton azdır.
"Bu il Rusiyada məhsul yığımı vaxtından 10 gün əvvəl başlayıb, taxıl məhsuldarlığı hər hektarda 27,2 sentner təşkil edir. Ötən il bu göstərici hər hektara 48 sentner olub. Cənub və Mərkəzi federal dairələrdə taxıl əkin sahələrinə ciddi ziyan dəyib", - Buts vurğulayıb.
Onun sözlərinə görə, hazırda Saratov vilayətində buğda məhsuldarlığı hər hektarda 10 sentner təşkil edir. Orta çoxillik səviyyədə isə hər hektardan 20 sentner məhsul götürülür.
"Cənub və Şimali-Qafqaz federal dairələrində məhsul yığımına burada başlayan yağışlar ciddi mane olur. Kubanda kənd təsərrüfatı bitkilərinin əkin sahələri seldən xeyli ziyan görüb", - o vurğulayıb.
