Bakı. Trend:
Dünyada təhsil sistemi artan qeyri-müəyyənlik, texnologiyaların və süni intellektin sürətli inkişafı fonunda dərin transformasiya dövrünü yaşayır.
Trend-in tədbirdə iştirak edən müxbirinin verdiyi məlumata görə, bunu ADA Universitetinin prorektoru Vəfa Kazdal IX ADA Beynəlxalq Təhsil Konfransında çıxışı zamanı deyib.
"Sabitlik dövrü, yəqin ki, artıq geridə qalıb və biz daimi qeyri-müəyyənlik dövrünə hazır olmalıyıq. Siyasi və sosial dəyişikliklər davam edir, texnologiyaların inkişafı, xüsusilə də süni intellekt təhsil sistemi qarşısında yeni çağırışlar yaradır. Məhz buna görə də bu gün bütün dünyada təhsil sistemi yol ayrıcındadır, özünü yenidən dərk edir və transformasiya edir", - deyə o bildirib.
V.Kazdalın sözlərinə görə, builki konfransın "Pedaqoji transformasiya dövründə tədris və təlim" mövzusu da məhz bu dəyişikliklərə həsr olunub.
O qeyd edib ki, universitetdə son bir həftə ərzində keçirilən məzun tədbirlərində qeyri-müəyyənlik, texnologiyaların təsiri və təhsilin dəyişən rolu ilə bağlı məsələlər dəfələrlə müzakirə olunub.
"Bütün bu suallar bizi düşündürür: informasiyanın bu qədər əlçatan olduğu və süni intellektin təhsilin bir çox aspektini öz üzərinə götürdüyü bir dövrdə tələbələrin öyrənməyə marağını necə qoruyaq? Müəllimin rolu necə dəyişir? Biz auditoriyada müəllim olaraq qalırıq, yoxsa təhsil təcrübəsini formalaşdıran və mentorluq edən şəxslərə çevrilirik?" - deyə prorektor bildirib.
Kazdal vurğulayıb ki, konfrans hər il beynəlxalq iştirakçılar baxımından genişlənir və dünya təhsil ictimaiyyətində daha çox tanınır. Bu il tədbirdə Yamayka, Braziliya, Türkiyə, Qazaxıstan, Tanzaniya, Pakistan və İspaniyadan nümayəndələr və məruzəçilər iştirak edirlər.
"Konfrans tədricən, addım-addım, lakin inamla beynəlxalq təhsil ictimaiyyəti üçün daha tanınmış və cəlbedici platformaya çevrilir. Ümid edirik ki, yaxın gələcəkdə iştirakçıların coğrafiyası daha da genişlənəcək", - deyə o bildirib.
Prorektorun sözlərinə görə, konfransın inkişafı ADA Universitetinin Təhsil Məktəbinin fəaliyyəti ilə birbaşa bağlıdır. Məktəb son illərdə təsir dairəsini əhəmiyyətli dərəcədə genişləndirib və hazırda yalnız Bakıda deyil, ölkənin regionlarında da təhsil proqramları həyata keçirir.
"Bu gün Təhsil Məktəbi yalnız kəmiyyət baxımından böyümür. O, təsiri, məzunlarının nailiyyətləri və təhsilin inkişafına verdikləri töhfə sayəsində inkişaf edir. Beynəlxalq konfransı dinamik, dayanıqlı və sistemli platforma kimi inkişaf etdirməyimizin əsas səbəblərindən biri də məhz budur", - deyə Kazdal bildirib.
O, həmçinin tədqiqat potensialının inkişafı proqramının məzunlarından birinin ABŞ-nin bir neçə aparıcı universitetinə qəbul olunduğunu və sonda Pensilvaniya Universitetini seçdiyini nümunə göstərib.
"Belə nailiyyətlər göstərir ki, səylərimiz və birgə fəaliyyətimiz nəticə verir. Bu insanlar geri qayıdacaq və ölkəmizin təhsil sisteminə müsbət təsir göstərməyə davam edəcəklər", - deyə prorektor vurğulayıb.
