Azərbaycan, Bakı, 30 aprel /Trend, müxbir A. Axundov/
Hazırda Azərbaycanın Mərkəzləşdirilmiş Kredit Reyestrində (MKR) 1,6 milyondan çox borclunun 4,7 milyon krediti barədə məlumat toplanıb. Trend-in məlumatına görə, bunu çərşənbə axşamı Azərbaycan Mərkəzi Bankı (AMB) yanında MKR Xidmətinin rəhbəri Elçin Həbibov Bakıda keçirilən "Kredit bürosu" konfransında çıxışı zamanı bildirib.
Konfrans Beynəlxalq Maliyyə Korporasiyasının (IFC) Mərkəzi Asiya və Azərbaycanda maliyyə infrastrukturunun möhkəmləndirilməsi (ACAFI) üzrə layihə çərçivəsində təşkil edilib.
"AMB-nin maliyyə sektorunun infrastrukturunun yaxşılaşdırılması üzrə Azərbaycan Əmanətlərin Sığortalanması Fondu, Azərbaycan İpoteka Fondu, həmçinin Kredit Reyestrinin yaradılması kimi belə tədbirləri sektorda sabitliyin möhkəmləndirilməsinə yardım edir. Ötən il MKR-də rekord sayda, yəni milyondan çox sorğu qeydə alınıb, cari ilin I rübündə 430 min sorğu almışıq", - Həbibov deyib.
Onun sözlərinə görə, AMB ölkədə özəl kredit bürolarının yaradılması üzrə təşəbbüsləri dəstəkləyir.
"Azərbaycanda özəl kredit bürolarının yaradılması ölkənin maliyyə sektorunun davamlılığını və sabitliyini möhkəmləndirəcək" , - Həbibov qeyd edib.
