Azərbaycan, Bakı, 20 may /Trend, müxbir E.Əliyev/
2013-cü ilin birinci rübündə mənzil bazarında qiymətlər 2,5 faiz artıb. Trend-in məlumatına görə, bu barədə Azərbaycan Mərkəzi Bankının (AMB) yanvar-mart ayları üzrə pul siyasəti icmalında deyilir.
Bu dövrdə təkrar və ilkin mənzil bazarında artım müvafiq olaraq 2,5 faiz və 2 faiz təşkil edib.
İcmalda qeyd olunur ki, təkrar mənzil bazarında elit mənzillərin qiymətləri sabit qalsa da, digər mənzil növləri üzrə qiymət artımı müşahidə olunub.
Hesabat dövründə yaşayış və kommersiya obyektlərində kirayə haqqı müvafiq olaraq 12,1 faiz və 2,2 faiz artıb.
Rüb ərzində ipoteka kreditləşməsinin davam etməsi daşınmaz əmlak bazarında, xüsusilə təkrar bazarda aktivliyə təsir göstərən başlıca amillərdən olub.
2013-cü ilin mart ayında banklar tərəfindən verilən ipoteka kreditlərinin həcmi 15,2 milyon manat təşkil edib, Azərbaycan İpoteka Fondu tərəfindən təkrar maliyyələşdirilən kreditlərin həcmi 12,05 milyon manata çatıb.
