Azərbaycan, Bakı, 16 sentyabr /Trend, müxbir A. Axundov/
2013-ci ilin yanvar-avqust aylarında Azərbaycanda tikinti materiallarının istehsalı ilə məşğul olan şirkətlər 230,8 milyon manat dəyərində məhsul istehsal ediblər ki, bu da ötən ilin analoji dövründə qeydə alınan göstəricidən 21,6 faiz çoxdur. Trend-in məlumatına görə, bu barədə Dövlət Statistika Komitəsinin hesabatında bildirilir.
Hesabatda deyilir ki, yanvar-avqust aylarında sement istehsalı 2,7 faiz artaraq 1,3 milyon ton, tikinti gipsi istehsalı 1,7 faiz artaraq 135,5 min ton, hörmə üçün hazır beton qarışığı istehsalı 9,2 faiz artaraq 914,7 min ton olub.
2013-cü ilin sentyabrın birinə müəssisələrin anbarlarında 18,6 milyon manatlıq və ya ölkə sənayesi üzrə olan hazır məhsul ehtiyatının 6,6 faizi qədər hazır məhsul ehtiyatı olub.
