Azərbaycan, Bakı, 19 fevral /Trend, müxbir A.Axundov/
2013-cü ildə Azərbaycanın mənzil bazarında qiymətlər 6,5 faiz bahalaşıb. Trend-in məlumatına görə, bu barədə Azərbaycan Mərkəzi Bankının (AMB) ötən ilin yekunlarına dair pul siyasəti icmalında deyilir.
Hesabatda Dövlət Statistika Komitəsinin məlumatına istinadən bildirilir ki, təkrar və ilkin mənzil bazarlarında qiymətlər ötən il müvafiq olaraq 6,5 və 3,8 faiz artıb.
Təkrar mənzil bazarında daha çox birtipli mənzillər (7,7 faiz), ilkin bazarda isə yaxşı layihələndirilmiş mənzillər (9,5 faiz) bahalaşıb.
"MBA LTD" konsaltinq şirkətinin məlumatına görə, yaşayış sahələrinin icarə haqqı 1,5 faiz ucuzlaşıb, kommersiya obyektlərinin icarəsi isə 0,8 faiz bahalaşıb.
İcmalda qeyd olunur ki, hesabat dövründə ipoteka kreditləşməsinin davam etməsi daşınmaz əmlak bazarında, xüsusilə təkrar bazarda aktivliyə təsir göstərən faktorlardan biri olub. 2013-cü ildə Azərbaycan bankları 113 milyon manat həcmində ipoteka kreditləri veriblər.
